1. Sharhlanayotgan ushbu modda mehnat munosabatlari sohasidagi muhim kafolatlarning biri - ishga taklif etilgan shaxslarning huquqiy himoyasini mustahkamlashga qaratilgan. Mazkur normada taklifnoma yuborilgan fuqarolarning ishga qabul qilinishidagi kafolatlari, ularning huquqiy maqomi va ish beruvchining majburiyatlari aniq ifodalangan. Shu orqali mehnat munosabatlari shaffofligi va barqarorligini taʼminlash maqsad qilingan.

Ushbu moddaga koʻra, agar ish beruvchi jismoniy shaxsga ishga joylashtirish (ishga qabul qilish) toʻgʻrisida taklif yuborgan boʻlsa, mazkur taklifnoma yuridik kuchga ega hisoblanadi. Demak, taklifnoma bu - mehnat shartnomasini tuzish uchun ish beruvchi tomonidan berilgan aniq va toʻgʻridan-toʻgʻri rozilikdir. U qonunchilikda "oferta" tushunchasiga yaqin turadi, yaʼni shartnoma taklifining huquqiy shakli sifatida baholanadi. Agar taklifnomada amal qilish muddati koʻrsatilmagan boʻlsa, u holda taklifnoma yuborilgan kundan boshlab 1 oy mobaynida amal qiladi. Ushbu taklifnomada koʻrsatilgan muddat yoki 1 oy ichida ish beruvchi ushbu shaxsni ishga qabul qilishni rad etishga haqli emas.

Taklifnomaning huquqiy tabiati va shakli masalasiga kelsak, mazkur moddada taklifnoma atamasining aniq taʼrifi keltirilgan. Unga koʻra, taklifnoma — ish beruvchi tomonidan jismoniy shaxs bilan mehnat shartnomasi tuzish boʻyicha bildirilgan aniq rozilik hisoblanadi. Taklifnoma:

yozma yoki elektron shaklda;

ish beruvchining tegishli vakolatli mansabdor shaxsi tomonidan;

rasmiy tarzda yuborilishi shart.

Ish beruvchi tomonidan ishga taklif etilgan shaxslarni ishga qabul qilmaslik ishga qabul qilishni qonunga xilof ravishda rad etish hisoblanadi (MK 119-modda sharhiga qarang).

MKning 220-moddasi toʻrtinchi qismiga koʻra, agar xodim ish beruvchining taklifiga koʻra ishga qabul qilingan boʻlsa, ushbu moddaning birinchi qismida nazarda tutilgan har yilgi qoʻshimcha mehnat taʼtilini olish huquqini beruvchi ish stajiga boshqa ish beruvchidagi ish staji kiritiladi. Mikrofirmalar xodimlariga ushbu moddaning birinchi qismida nazarda tutilgan har yilgi qoʻshimcha mehnat taʼtili ushbu Kodeksning 505-moddasi uchinchi qismida nazarda tutilgan oʻziga xos xususiyatlar hisobga olingan holda beriladi.

2. Ushbu modda birinchi qismining qoidalari xodim qonunchilikda nazarda tutilgan barcha zarur tartib-taomillardan oʻtgan taqdirda chet el fuqarolariga va fuqaroligi boʻlmagan shaxslarga nisbatan tatbiq etiladi.

Mazkur huquqiy normaga koʻra, agar chet el fuqarosi yoki fuqaroligi boʻlmagan shaxs Oʻzbekiston hududida qonunan belgilangan tartibda mehnat faoliyatini amalga oshirish uchun barcha zarur ruxsatnomalar va rasmiylashtirish jarayonlaridan oʻtgan boʻlsa, ularga nisbatan ham tatbiq etiladi.

Qonunchilikda nazarda tutilgan zarur tartib-taomillarga MK 523-moddasi birinchi qismiga koʻra, mehnat faoliyatini amalga oshirish maqsadida Oʻzbekiston Respublikasi hududiga qonuniy ravishda kirib kelgan chet el fuqarolari Oʻzbekiston Respublikasi hududida mehnat faoliyatini Oʻzbekiston Respublikasi hududida mehnat faoliyatini amalga oshirish huquqiga doir tasdiqnoma asosidagina amalga oshirish huquqiga ega. Bundan tashqari Oʻzbekistonda boʻlish qoidalari, viza masalalari ham nazarda tutilgan.