Mazkur modda davlat mehnat inspektorlarining noqonuniy qarorlari, harakatlari yoki harakatsizligi ustidan shikoyat qilish mexanizmini aniq belgilaydi. Bu, fuqarolar va tashkilotlarning huquqlarini himoya qilishda muhim ahamiyatga ega.

Gʻayriqonuniy yoki noqonuniy qarorlar deganda davlat mehnat inspektorlar tomonidan chiqarilgan, amaldagi qonunchilikka zid boʻlgan har qanday qaror tushuniladi.

Gʻayriqonuniy harakatlar deganda davlat mehnat inspektorining vakolatini suiisteʼmol qilish yoki qonunda belgilanmagan harakatlarni amalga oshirishi tushuniladi.

MISOL

Davlat mehnat inspektorining ish beruvchiga bosim oʻtkazish maqsadida asossiz jarima solishga uringan yoki tekshiruv jarayonida shaxsiy maʼlumotlarni noqonuniy ravishda oshkor qilgan yoxud korxona faoliyatiga asossiz aralashgan.

Gʻayriqonuniy harakatsizlik deganda davlat mehnat inspektorning oʻz vazifalarini bajarmasligi, yaʼni qonun boʻyicha amalga oshirishi shart boʻlgan harakatlarni bajarmasligi.

MISOL

Xodimning mehnat huquqi buzilganligi haqidagi arizasiga davlat mehnat inspektorining hech qanday javob bermasligi yoki muddatida chora koʻrmasligi yoxud tekshiruv oʻtkazmasligi.

Shikoyat qilish uchun ikkita asosiy yoʻnalish mavjud boʻlib, yuqori turuvchi mehnat inspektsiyasiga. Bu Davlat mehnat inspektsiyasining tegishli hududiy inspektsiyasiga yoki markaziy apparati boʻlishi mumkin. Bunday shikoyatlar maʼmuriy tartibda koʻrib chiqiladi.

MISOL

Agar shikoyat qiluvchi Qashqadaryo viloyati Gʻuzor tumanida joylashgan tashkilot xodimi yoki ish beruvchi boʻlsa, davlat mehnat inspektorining harakatlaridan norozi boʻlsa, Qashqadaryo viloyati Kambagʻallikni qisqartirish va bandlik boshqarmasi Davlat mehnat inspektsiyasiga yoki toʻgʻridan-toʻgʻri Kambagʻallikni qisqartirish va bandlik vazirligi Davlat mehnat inspektsiyasiga shikoyat qilishi mumkin.

Shikoyat sudga taqdim etilishi mumkin. Agar yuqori turuvchi organ shikoyatni qanoatlantirmasa yoki shikoyat qiluvchi sud orqali oʻz huquqlaringizni himoya qilishni afzal koʻrsa, shu yoʻlni tanlashi mumkin. Sud shikoyatni qonuniy tartibda koʻrib chiqadi va tegishli qaror qabul qiladi.

MISOL

Davlat mehnat inspektorining qarori xodimning ishga tiklanish huquqini inkor etsa, u fuqarolik ishlari boʻyicha sudga murojaat qilib, bu qarorni bekor qilishni talab qilishi mumkin.

Davlat mehnat inspektorlarining gʻayriqonuniy harakatlari ustidan shikoyat qilish quyidagilar uchun muhim:

huquqlarni himoya qilish, bu fuqarolarning va tashkilotlarning oʻz huquqlarini himoya qilish imkoniyatini beradi;

masʼuliyatni oshirish, bu davlat mehnat inspektorlarni oʻz vazifalarini bajarishda masʼuliyatliroq boʻlishga undaydi;

qonun ustuvorligini taʼminlash, bu mehnat toʻgʻrisidagi qonunchilikning barcha uchun birdek ishlashini taʼminlashga yordam beradi.

Shikoyat berishda barcha dalillar va hujjatlarni toʻliq taqdim etish, shuningdek shikoyatni asosli va tushunarli tarzda bayon etish muhimdir.