Agar jamoaviy muzokaralar jarayonida jamoaviy muzokaralar taraflari muzokaralar predmeti boʻlgan ayrim masalalar yuzasidan kelishuvga erisha olmagan boʻlsa, ular ixtiloflarga sabab boʻlmagan masalalarga doir kelishuvni rasmiylashtiradi va bir vaqtning oʻzida kelishuvga erishib boʻlmagan masalalar boʻyicha ixtiloflar bayonnomasini tuzadi.
Agar jamoaviy muzokaralar jarayonida muzokaralar predmeti boʻlgan barcha masalalar yuzasidan kelishilgan qaror qabul qilinmagan boʻlsa ham muzokaralar taraflari ixtiloflar bayonnomasini tuzadi.
Ixtiloflar bayonnomasida taraflarning ixtiloflarni bartaraf etish uchun zarur boʻlgan choralar va jamoaviy muzokaralarni qayta tiklash muddatlari toʻgʻrisidagi kelishib olingan takliflari koʻrsatiladi.
Taraflar jamoaviy muzokaralarni qayta tiklash chogʻida hal qila olmagan ixtiloflarni hal etishga (tartibga solishga) doir nizolar ushbu Kodeksda jamoaviy mehnat nizolarini hal etish uchun belgilangan tartibda koʻrib chiqiladi.
1. Sharhlanayotgan moddaning birinchi qismi qoidasi jamoaviy muzokaralar jarayonida kelishuvga erishilmagan holatlarda taraflarning harakatlarini belgilaydi. Unga koʻra, agar taraflar muzokaralar predmeti boʻlgan ayrim masalalar yuzasidan kelishuvga erisha olmasa, ular ixtiloflarga sabab boʻlmagan masalalarga doir kelishuvni rasmiylashtiradi va bir vaqtning oʻzida kelishuvga erishib boʻlmagan masalalar boʻyicha ixtiloflar bayonnomasini tuzadi.
Muzokaralar predmeti boʻlgan ayrim masalalar yuzasidan taraflar muhokama qilinayotgan barcha masalalar boʻyicha bir fikrga kela olmagan boʻlsa, kelishuvga erisha olmagan boʻladi.
Ular ixtiloflarga sabab boʻlmagan masalalarga doir kelishuvni rasmiylashtiradi, yaʼni taraflar kelishuvga erishilgan masalalar boʻyicha yozma ravishdagi bayonnoma tuzadilar.
Bu taraflar kelishilmagan masalalarni qayd etib, ular boʻyicha oʻz pozitsiyalarini bayon qiladigan hujjat tuzishlari kerakligini anglatadi.
Ushbu qoidaning asosiy maqsadi jamoaviy muzokaralar jarayonida erishilgan natijalarni mustahkamlash, kelishilmagan masalalarni aniq belgilab olish va kelgusida ular boʻyicha muzokaralarni davom ettirish uchun zamin yaratishdir.
2. Jamoaviy muzokaralar jarayonida ayrim masalalarda kelishuvga erishib, ayrimlarida erishilmagan boʻlsa ham, bu haqida muzokaralar taraflari ixtiloflar bayonnomasini tuzadi.
Kelishuvga erishilgan masalalar boʻyicha tegishli hujjatlar rasmiylashtiriladi.
MISOL
Jamoaviy muzokaralarda ish haqini oshirish va mehnat sharoitlarini yaxshilash boʻyicha muzokaralar oʻtkazildi. Muzokara natijasida mehnat sharoitlarini yaxshilashga kelishuvga erishildi, lekin ish haqini oshirishda kelishuvga erishilmadi.
Ushbu holatda mehnat sharoitlarini yaxshilash boʻyicha jamoa shartnomaga tegishli oʻzgartirish kiritiladi, ammo ish haqini oshirish masalasi boʻyicha kelishuvga erishilmaganligi ixtiloflar bayonnomasi bilan rasmiylashtiriladi.
3. Jamoaviy muzokaralarda kelishuvga erishilmagan masalalar boʻyicha rasmiylashtiriladigan ixtiloflar bayonnomasida taraflarning ixtiloflarni bartaraf etish uchun zarur boʻlgan choralar (mavjud muammolar, imkoniyatlar va h.k.) va jamoaviy muzokaralarni qayta tiklash muddatlari toʻgʻrisidagi kelishib olingan takliflari koʻrsatiladi.
Kelishib olingan takliflar koʻrsatilgandan keyin taraflar ularni belgilangan muddatlarda qayta koʻrib chiqishlari yana muzokaralar oʻtkazishi kerak boʻladi.
4. Taraflar jamoaviy muzokaralarni qayta tiklash chogʻida hal qila olmagan ixtiloflarni hal etishda ijobiy natijaga erishilmasa, yaʼni kelishuvga erishilmasa, bu jamoaviy mehnat nizolari hisoblanadi va bunday nizolarni koʻrib chiqish MKning 570-581-moddalarida belgilangan tartibda hal etiladi.
O'zbekiston Respublikasi Kambag'allikni qisqartirish va bandlik vazirligi