1.1. Ishlab chiqarish taʼlimi shartnomasini tuzish orqali taʼlim muassasasi va tashkiloti birgalikda talabalar amaliyotining maqsadi, vazifalari va shartlarini aniqlaydilar. Bu oʻzaro majburiyatlarga asoslangan shaffof va aniq qoidalarni oʻrnatishga yordam beradi. Shartnomaviy munosabatlarni ishlab chiqarish taʼlimi tizimiga kiritish nazariya va amaliyot oʻrtasida uygʻun oʻzaro taʼsirni yaratishga imkon beradi.

Mazkur moddaning birinchi qismida ishlab chiqarish taʼlimi shartnomasining shartlari keltirilgan. Ushbu shartnoma shartlari tuzilishi jihatidan mehnat shartnomasidan farq qilishi mumkin, lekin mazmunan bu shartlar bir biriga oʻxshash. Shu sababli, mazkur shartnoma shartlari MKning 105-moddada koʻrsatilgan taqiqlarni inobatga olgan holda tuzilishi lozim.

Shuningdek, ushbu qismda ishlab chiqarish taʼlimi shartnomasida koʻrsatilishi kerak boʻlgan shartlar, maʼlumotlar belgilangan.

1.2. Taraflarning nomi - ishlab chiqarish taʼlimi shartnomasi taraflari oʻquvchi (ish qidiruvchi, maʼlum bir tashkilotning xodimi) va ish beruvchidir. Mazkur shartnomaning maqsadi ish beruvchi oʻquvchini maʼlum bir kasb, mutaxassislik, malaka boʻyicha kasbga tayyorlash, qayta tayyorlashni tashkil etish majburiyatini olishdan iboratdir. Ishlab chiqarish taʼlimini muvaffaqiyatli tugatgan talaba mutaxassisligi, malakasi boʻyicha ish bilan taʼminlanishi lozim.

Taraflarning nomini yozishda ish beruvchi tashkilot nomini va uning nomidan shartnomada taraf sifatida ish beruvchining familiyasi, ismi va sharifi koʻrsatiladi, oʻquvchining ham familiyasi, ismi va sharifi koʻrsatiladi.

1.3. Oʻquvchi tomonidan olinadigan aniq malaka deganda shaxsning kasbiy faoliyatning muayyan turini bajarishga tayyorgarligini ifodalaydigan, maʼlumot toʻgʻrisidagi tegishli hujjat bilan tasdiqlanadigan bilim, qobiliyat, mahorat va koʻnikmalar darajasi tushuniladi.

Yaʼni, aynan qaysi kasb yoki lavozim boʻyicha nimalarni oʻrganishi aniq koʻrsatiladi.

1.4. Ish beruvchining oʻquvchiga ishlab chiqarish taʼlimini oʻtash uchun zarur shart-sharoitlarni taʼminlash majburiyati – MKning 383-moddasiga koʻra mehnat shartnomasi boʻyicha ishdan ajralmagan holda taʼlim tashkilotlarida tahsil olib, oʻquv rejasini bajarayotgan xodimlarga ish joyi boʻyicha oʻrtacha ish haqi saqlangan holda oʻquv taʼtili, qisqartirilgan ish haftasi, yillik mehnat taʼtillarini ish beruvchi, ularning xohishiga koʻra, bakalavriat talabalari uchun davlat attestatsiyasi va bitiruv malaka ishini himoya qilish, magistratura talabalari uchun magistrlik dissertatsiyasini himoya qilish vaqtiga yoxud imtihonlar va laboratoriya-imtihon sessiyalari vaqtiga toʻgʻrilab berishi hamda mehnat toʻgʻrisidagi qonunchilikda va mehnat haqidagi boshqa huquqiy hujjatlarda belgilangan oʻzga kafolatlar beriladi.

Oʻquvchiga ishlab chiqarish taʼlimini oʻtash uchun zarur shart-sharoitlarni taʼminlash deganda nafaqat murabbiylarni biriktirish, balki xodimlar uchun yaratilishi kerak boʻlgan boshqa mehnat sharoitlarini ham ushbu oʻquvchiga yaratib berilishi kerak.

1.5. Oʻquvchining ishlab chiqarish taʼlimini oʻtash va olingan malakaga muvofiq ish beruvchi bilan tuzilgan mehnat shartnomasi boʻyicha ishlab chiqarish taʼlimi shartnomasida belgilangan muddat davomida ishlab berish majburiyati ham ishlab chiqarish taʼlimi shartnomasida koʻrsatilishi kerak.

Chunki, ushbu shartnomadan tashqari mehnat shartnoma ham tuzilgan boʻladi, mazkur mehnat shartnoma boʻyicha xodim sifatida mehnat vazifalarini bajarsa, ushbu vazifalarni bajarish bilan birga taʼlim ham oladi.

Ishlab chiqarish taʼlimi shartnomasida koʻrsatilgan ish beruvchi bilan tuzilgan mehnat shartnomasining muddati kasbiy tayyorgarlik davomiyligi va ish beruvchining bunday tayyorgarlikni taʼminlash xarajatlariga mutanosib boʻlishi kerak, lekin u uch yildan oshmasligi lozim.

1.6. Ishlab chiqarish taʼlimining muddati - ishlab chiqarish taʼlimi shartnomasi muayyan ishni bajarish uchun talab etiladigan malakani olish uchun zarur boʻlgan muddatga tuziladi (375-modda sharhiga qarang).

1.7. Ishlab chiqarish taʼlimi shartnomasida oʻqish davrida mehnatga haq toʻlash miqdori koʻrsatilishi kerak. Oʻquvchilarga ishlab chiqarish taʼlimi davrida stipendiya toʻlanadi, uning miqdori ishlab chiqarish taʼlim shartnomasida belgilanadi va olinayotgan malakaga bogʻliq boʻladi, lekin qonunchilikda belgilangan mehnatga haq toʻlashning eng kam miqdoridan kam boʻlmasligi kerak (MKning 379-modda sharhiga qarang).

1.8. Ishlab chiqarish taʼlimi shartnomasida taraflarning rekvizitlari koʻrsatiladi.

Oʻquvchining ishlab chiqarish taʼlimi shartnomasida koʻrsatiladigan rekvizitlari quyidagilar boʻlishi mumkin:

familiyasi, ismi va otasining ismi;

shaxsini tasdiqlovchi hujjatlar toʻgʻrisidagi maʼlumotlar;

yashash yoki turgan joyining manzili va u bilan bogʻlanishga doir maʼlumotlar;

jismoniy shaxsning shaxsiy identifikatsiya raqami.

Ish beruvchining ishlab chiqarish taʼlimi shartnomasida koʻrsatiladigan rekvizitlari quyidagilar boʻlishi mumkin:

ish beruvchining nomi: tashkilotning nomi, agar ish beruvchi tashkilotning alohida boʻlinmasi boʻlsa, — ushbu boʻlinmaning nomi, ish beruvchi jismoniy shaxs boʻlgan hollarda, — jismoniy shaxs boʻlgan ish beruvchining familiyasi, ismi, otasining ismi va pasport maʼlumotlari (identifikatsiyalovchi ID-kartasi maʼlumotlari), yakka tartibdagi tadbirkor boʻlgan ish beruvchi uchun esa uning familiyasi, ismi, otasining ismi, pasport maʼlumotlari (identifikatsiyalovchi ID-kartasi maʼlumotlari), shuningdek davlat roʻyxatidan oʻtganligi toʻgʻrisidagi guvohnomaning raqami va berilgan sanasi;

ish beruvchining shartnomani imzolagan vakili haqidagi maʼlumotlar va, agar tashkilot yoki uning alohida boʻlinmasi ish beruvchi boʻlsa, vakilga tegishli vakolatlar berilganligining asosi;

ish beruvchi tashkilotning joylashgan yeri (pochta manzili);

soliq toʻlovchining identifikatsiya raqami (bundan yakka tartibdagi tadbirkorlar boʻlmagan jismoniy shaxslar boʻlgan ish beruvchilar mustasno);

tashkilotlar yoki ularning alohida boʻlinmalari boʻlgan ish beruvchilarning, shuningdek yakka tartibdagi tadbirkorlarning bank rekvizitlari;

ish beruvchining aloqa maʼlumotlari (telefon raqamlari, elektron pochta manzili va boshqalar).

2. Ushbu moddaning ikkinchi qismi yuqorida koʻrsatilgan shartlar tugal roʻyxat emasligini hamda taraflarga boshqa shartlarni mustaqil ravishda belgilash va kiritish imkonini beradi. Masalan:

amaliyot davomida olingan maʼlumotlarning maxfiyligi toʻgʻrisidagi;

oʻquvchining stipendiyasiga ustamalar belgilash;

uy-joy va oziq-ovqat bilan taʼminlash va boshqalar.

Ushbu shartnomaning shartlari faqat taraflarning oʻzaro kelishuvi bilan yozma ravishda qoʻshimcha kelishuv tuzish orqali oʻzgartirilishi mumkin.

3. Sharhlanayotgan moddaning uchinchi qismida ishlab chiqarish taʼlimi shartnomasi va unga mehnat shartnomasini mutanosib tuzishga oid ayrim talablar belgilangan. Jumladan:

tuzilgan mehnat shartnomasi boʻyicha ishlab berish muddati ishlab chiqarish taʼlimi muddatiga va ish beruvchining uni oʻtkazishga doir chiqimlariga mutanosib boʻlishi;

muddati har qanday holda ham ushbu Kodeksning 110-moddasi birinchi qismining uchinchi xatboshisi, yaʼni 3 yil muddatdan oshib ketmasligi kerak.