Sharhlanayotgan modda ishlab chiqarish taʼlimi shartnomasining tushunchasini, taraflarini, shaklini va maqsadini aniqlashtiradi. Ishlab chiqarish boʻyicha oʻquv shartnomasi ish beruvchiga oʻz tashkilotining talablariga javob beradigan xodimlarni tayyorlash imkoniyatini beradi.

Bundan tashqari, ishlab chiqarish taʼlimi shartnomasining maqsadi yetarlicha malakaga ega boʻlmagan shaxslarni kasbiy bilimlar, malakalar va koʻnikmalarni oʻrganish yoki qayta tayyorlashga xizmat qiladi.

Shuningdek, ushbu moddada ishlab chiqarish taʼlimi shartnomasining taraflari ham belgilanmoqda. Unga koʻra ushbu shartnomaning taraflari ish beruvchi va oʻquvchi hisoblanadi.

Oʻquvchi deganda ish beruvchida ishlayotgan xodim yoki ishlamaydigan ish qidirayotgan shaxs, shu bilan birga talabalar ham tushuniladi. Mazkur holatda ish qidirayotgan shaxs deganda ishlamaydigan shaxslar tushuniladi. Ushbu shaxslar mehnat organlari tomonidan Oʻzbekiston Respublikasining “Aholi bandligi toʻgʻrisida”gi Qonuniga asosan ish qidirayotgan shaxs sifatida roʻyxatga olingan va yoʻllanma bilan yuborilgan shaxslar ham boʻlishi mumkin.

Ushbu moddadagi yana bir norma taraflar oʻrtasida ishlab chiqarish taʼlimi shartnomasi bilan birga mehnat shartnomasi tuzilishi lozimligi ham koʻrsatilgan.

Bundan tashqari, ishlab chiqarish taʼlimi shartnomasi oʻquvchi bilan ishdan ajralgan yoki ajralmagan holda taʼlim olish uchun tuzilgan, kasbiy bilimlar, malakalar va koʻnikmalarni oʻrganishi yoki qayta tayyorlash maqsadida tuziladi.

Oʻzbekiston Respublikasining “Taʼlim toʻgʻrisida”gi Qonunining 5-moddasiga koʻra ishlab chiqarishdan ajralgan holda deganda kunduzgi taʼlim shaklida taʼlim olishi va ishlab chiqarishdan ajralmagan holda deganda sirtqi, kechki, masofaviy taʼlim shaklida taʼlim olish tushuniladi.