1. Sharhlanayotgan moddada ijtimoiy-mehnat masalalari boʻyicha boshlangʻich darajadagi ijtimoiy-mehnat masalalari boʻyicha komissiya toʻgʻrisida qoidalar belgilangan. Ushbu qoidalar MKning ushbu normasidan tashqari Oʻzbekiston Respublikasining “Kasaba uyushmalari toʻgʻrisida”gi Qonuni 49-moddasida ham belgilangan. Unga koʻra, tashkilotlar darajasida jamoa muzokaralarini olib borish uchun boshlangʻich kasaba uyushmalari tashkilotining vakillaridan va ish beruvchining vakillaridan iborat ikki tomonlama komissiyalar tuziladi.

2. Son jihatidan tarkibni kelishishda birinchi navbatda, komissiyada jami necha kishi boʻlishi va har bir tarafdan nechtadan vakil qatnashishi belgilanadi.

Sonni ish beruvchi bir tomonlama belgilay olmaydi. U albatta kasaba uyushmasi qoʻmitasi bilan kelishishi shart.

Odatda taraflardan teng miqdorda vakil saylanadi (masalan, 3 kishi ish beruvchidan va 3 kishi kasaba uyushmasidan). Bu ikki tarafning ovozlari teng boʻlishini va bir taraf ikkinchisiga oʻz irodasini oʻtkaza olmasligini taʼminlaydi.

Ish beruvchi (tashkilot rahbari) oʻz tomonidan muzokaralarda qatnashadigan shaxslarni oʻzi tanlaydi. Odatda kadrlar boʻlimi boshligʻi, bosh buxgalter, yurist yoki boshqa masʼul xodimlar boʻladi. Bu ish beruvchining buyrugʻi bilan rasmiylashtiriladi.

Kasaba uyushmasi vakillarini tasdiqlashda ish beruvchi kasaba uyushmasidan kimlar vakil boʻlishiga aralashishga haqqi yoʻq. Kasaba uyushmasiga ishchilar orasidan saylangan obroʻli xodimlar vakil boʻlishi mumkin. Bu kasaba uyushmasi qoʻmitasining qarori (yoki bayonnomasi) bilan rasmiylashtiriladi.