Sharhlanayotgan moddada ijtimoiy-mehnat masalalari boʻyicha hududiy, tarmoq va respublika komissiyalarining reglamenti haqidagi qoida haqida soʻz boradi.

Qoidaga koʻra, mazkur komissiyalar oʻz faoliyatini tegishli komissiyaning birinchi majlisida taraflarning kelishuvi bilan tasdiqlanadigan Komissiya reglamentiga binoan amalga oshiradi. Masalan, 2023 yil 31 may kuni Ijtimoiy-mehnat masalalari boʻyicha respublika komissiyasi oʻzining 3-sonli majlisi bayonnomasi bilan Ijtimoiy-mehnat masalalari boʻyicha respublika uch tomonlama komissiyasining reglamentini qabul qildi.

Reglamentda komissiya faoliyatini tashkil etish, uning aʼzolari, ishchi organlari va boshqa bir qator muhim masalalar oʻz aksini topgan. Reglament komissiyalar faoliyatini tashkil etish va qonunchilikda belgilangan vazifalarini bajarish, tegishli vakolat va majburiyatlarga rioya etish kabi faoliyatni tartibga solishga qaratilgan hujjat hisoblanadi.

Reglament (frants. Reglement-tartib, qoida) lugʻaviy maʼnosiga koʻra: davlat organlari, muassasalari, tashkilotlarining ish tartibini belgilaydigan qoidalar majmui, majlis, konferentsiya va boshqalarni olib borish tartibi hisoblanadi.

Reglament normativ-huquqiy hujjat boʻlmasada, lekin unda belgilangan munosabatlar huquqiy tartibga solib turiladi.

Komissiyalarning reglamenti ham ushbu komissiyalar xususiyatlarini koʻrsatadigan va faoliyatini tartibga solib turadigan qoidalar yigʻindisi hisoblanadi.

Reglamentning boʻlishi komissiyalar faoliyatini qonunchilik doirasida olib borish, kollegiallikni taʼminlash, qarorlar qabul qilishda ochiqlikni taʼminlash, qarorlar ijrosini taʼminlash va nazorat qilishda huquqiy asos boʻlib xizmat qiladi.