1. Sharhlanayotgan moddada ijtimoiy-mehnat masalalari boʻyicha komissiyalarning qarorlarining xususiyatlari, qarorlar qabul qilinishi, ularning kuchga kiritilishi va eʼlon qilinishi bilan bogʻliq munosabatlar haqida fikr yuritiladi.

Ijtimoiy-mehnat masalalari boʻyicha komissiyalarning qarorlari qonuniy boʻlishi uchun ijtimoiy sheriklikning har bir tarafidan belgilangan vakillarning koʻpchiligi ularni yoqlab ovoz bergan boʻlishi kerak.

Vakillarning koʻpchiligi deganda ishtirokchilarning 50 foizdan yuqorisi yoqlab ovoz bergan boʻlishi kerak.

Komissiya qarori kelishuv asosida yoki agar kelishuv boʻlmasa, har bir tomondan bittadan ovoz printsipi boʻyicha ovoz berish orqali qabul qilinadi.

Komissiya qarori bayonnoma shaklida qabul qilinadi, raislar tomonidan imzolanadi va tavsiya xususiyatiga ega boʻladi.

Qarorlarni tez qabul qilish maqsadida komissiya raisi komissiyaning alohida masalalari boʻyicha soʻrov orqali aʼzolar bilan kelishilgan qarorlarni tasdiqlashi mumkin.

Komissiyaning vakolatlari doirasida qabul qilingan qarorlarini tomonlar idora ichki qarorlarini qabul qilish orqali amalga oshiradi.

Komissiya qarorlarining ijrosini tomonlar mustaqil nazorat qiladi.

Bir yilda kamida bir marta bitimlarni amalga oshirish yakunlari va komissiya tomonidan qabul qilingan qarorlar toʻgʻrisidagi masalalar komissiyaga koʻrib chiqish uchun kiritiladi.

Bosh (hududiy) bitimni amalga oshirish yakunlari va komissiya tomonidan qabul qilingan qarorlar toʻgʻrisidagi yozma axborotni tomonlar kotibiyatga ularning bajarilishiga qarab yuboradi.

Komissiya faoliyati bilan bogʻliq xarajatlarni tomonlar oʻzaro kelishuv boʻyicha qoplaydi.

2. Sharhlanayotgan moddaning ikkinchi qismida ijtimoiy-mehnat masalalari boʻyicha komissiyalarning qarorlari kuchga kirish muddati belgilangan, yaʼni ushbu qarorlar tegishli reglamentda belgilangan muddatda kuchga kiradi.

Agar reglamentda muddat belgilanmagan boʻlsa, eʼlon qilingan vaqtdan boshlab kuchga kiradi.

3. Sharhlanayotgan moddaning uchinchi qismiga koʻra, ijtimoiy-mehnat masalalari boʻyicha komissiyalarning qarorini ijrochilarga yetkazish boʻyicha ikki xil tartib belgilangan, yaʼni boshlangʻich darajadagi ijtimoiy-mehnat masalalari boʻyicha komissiyalarning qarori ushbu qaror manfaatlariga daxldor boʻlgan xodimlarning eʼtiboriga ular qabul qilingan sanadan eʼtiboran oʻn kalendar kundan kechiktirmay yetkaziladi.

Qarorni imzo qoʻydirish orqali tanishtirish yoki barchaga koʻrinarli joyga osib qoʻyib yoki barcha xodimlar uchun moʻljallangan elektron platformalarga joylashtirish orqali yetkazilishi mumkin.

Ijtimoiy-mehnat masalalari boʻyicha hududiy, tarmoq va respublika komissiyalarining qarorlari ular qabul qilingan sanadan eʼtiboran oʻn kalendar kundan kechiktirmay ochiq foydalanish uchun ommaviy axborot vositalarida yoki tegishli komissiyalarning rasmiy veb-saytlarida joylashtirilishi lozim.