1. Sharhlanayotgan moddada ijtimoiy-mehnat masalalari boʻyicha komissiya ishini rejalashtirish masalalari va tartiblari haqida soʻz yuritiladi. Unga koʻra, ijtimoiy-mehnat masalalari boʻyicha komissiyaning navbatdagi yil uchun ish rejasi boʻlishi kerak va bu komissiyaning joriy yil toʻrtinchi choragidagi oxirgi majlisida tasdiqlanishi kerak.

Agar toʻrtinchi choragidagi oxirgi majlisida tasdiqlanmasa, boshqa majlisda tasdiqlanmasligini bildirmaydi. Boshqa majlisda ham tasdiqlash mumkin boʻladi, ammo komissiyaning samarali ishlashi uchun ushbu moddaning birinchi qismida aniq belgilangan.

Shuningdek, Oʻzbekiston Respublikasi Vazirlar Mahkamasining 2019 yil 3 iyuldagi “Ijtimoiy-mehnat masalalari boʻyicha uch tomonlama komissiyalar toʻgʻrisida”gi 553-son qarori bilan tasdiqlangan “Ijtimoiy-mehnat masalalari boʻyicha uch tomonlama komissiyalar toʻgʻrisida”gi nizomda ham tashkiliy masalalarni amalga oshirish boʻyicha bir qancha tartib belgilangan.

Hamraislar taqdimnomasi boʻyicha komissiya raisi tomonidan shakllantiriladigan kotibiyat komissiyaning ishchi organi hisoblanadi. Kotibiyat tarkibiga har bir tomondan bittadan vakil kiradi.

Komissiya kotibiyati:

komissiya majlislariga tayyorgarlik koʻradi;

komissiya qarorlari ijrosini nazorat qiladi;

komissiya aʼzolarini olib borilayotgan tadbirlardan xabardor qiladi;

komissiya ish rejalarini tayyorlaydi;

komissiya ish yurituvini amalga oshiradi;

davlat hokimiyati va boshqaruvi organlari, ish beruvchilar va xodimlar tashkilotlari, zarur hollarda esa korxonalar, tashkilotlar va muassasalar bilan tezkor aloqani amalga oshiradi;

ommaviy axborot vositalari bilan oʻzaro hamkorlik qiladi;

komissiya faoliyati toʻgʻrisida yillik maʼruzalar tayyorlaydi.

Komissiya oʻz faoliyatini ish rejalari asosida va ijtimoiy-mehnat sohasidagi masalalarni zudlik bilan hal etish zaruratini hisobga olib tashkil etadi.

Komissiya majlisi bir yilda kamida ikki marta chaqiriladi.

Majlis kun tartibi kotibiyat tomonidan ish rejasi va hamraislarning kelishilgan takliflari asosida tuziladi.

Majlis oʻtkaziladigan sana, vaqt, joy va uning kun tartibi toʻgʻrisida komissiya aʼzolari oldindan, biroq majlisdan kamida 10 kun avval xabardor qilinadi.

Komissiya majlisi, agar unda har bir tomondan aʼzolarning kamida yarmi ishtirok etgan boʻlsa, vakolatli hisoblanadi.

Komissiya aʼzolari:

komissiya faoliyatiga taalluqli hujjatlarni ishlab chiqishda ishtirok etishi;

komissiya qarorini ijro etishga koʻmaklashishi;

ish beruvchilar kasaba uyushmalari va birlashmalarini, davlat hokimiyati va boshqaruvi organlarini Komissiya faoliyati va Bosh (hududiy) bitim ijrosining borishidan muntazam xabardor qilishi;

qonunchilikda nazarda tutilgan hollarda Komissiya faoliyati toʻgʻrisidagi axborotning maxfiyligiga rioya qilishi va uni oshkor etmasligi shart.

2.1. Sharhlanayotgan moddaning ikkinchi qismida ijtimoiy-mehnat masalalari boʻyicha komissiyaning ish rejasida koʻrsatilishi kerak boʻlgan masalalar va maʼlumotlar belgilangan.

2.2. Ijtimoiy-mehnat masalalari boʻyicha komissiyaning ish rejasida komissiya reglamentini tayyorlash uchun masʼul boʻlgan komissiya aʼzolarini belgilash muhim, chunki ushbu aʼzolar keyingi bosqichdagi amalga oshirilishi kerak boʻlgan ishlarga masʼul hisoblanadi.

2.3. Ijtimoiy-mehnat masalalari boʻyicha komissiyaning ish rejasida komissiya majlislari oʻtkaziladigan sanalar albatta koʻrsatilishi kerak. Chunki barcha komissiya aʼzolari yoki boshqa tegishli masʼullar ushbu sana boʻyicha ishlarini rejalashtiradi.

Sanalarni belgilashda aniq bir sana yoki sanalar oraligʻidagi vaqtni koʻrsatish ham mumkin.

2.4. Ijtimoiy-mehnat masalalari boʻyicha komissiyaning ish rejasida komissiya muhokamasiga taqdim etiladigan masalalarning taʼrifi koʻrsatilishi kerak. Chunki komissiya aʼzolari muhokamaga tayyorgarlik koʻrib kelishi va muhokama samarali oʻtishiga xizmat qiladi.

Taqdim etiladigan masalalarning taʼrifi deganda har bir masalani mazmunini barchaga tushunarli, qisqa va aniq tarzda ifodalanishi kerakligini tushunish mumkin.

2.5. Ijtimoiy-mehnat masalalari boʻyicha komissiya ish rejasida komissiya majlisining kun tartibiga kiritiladigan masalalarni tayyorlash uchun masʼul boʻlgan komissiya aʼzolari kiritiladi.

Masʼul boʻlgan komissiya aʼzolari muhokama qilinishi kerak boʻlgan masaladan kelib chiqadi.

2.6. Ijtimoiy-mehnat masalalari boʻyicha komissiya ish rejasida jamoa kelishuvlarining, jamoa shartnomasining bajarilishi, komissiya tomonidan qabul qilingan qarorlarning roʻyobga chiqarilishi ustidan nazoratni amalga oshirish choralari ham kiritiladi.

Nazoratni amalga oshirish choralari deganda qancha davrda, qanday tartibda nazorat amalga oshirilishi (tekshirish, monitoring, hisobotni eshitish), bunga kimlar (komissiya aʼzolari) masʼul ekanligi aniq belgilash tushuniladi.

2.7. Ijtimoiy-mehnat masalalari boʻyicha komissiya ish rejasida komissiya ishining texnik taʼminotiga qaratilgan chora-tadbirlar kiritiladi.

Texnik taʼminotiga qaratilgan chora-tadbirlar deganda amalga oshiriladigan ishlarni sarflanadigan mablagʻlar, ushbu mablagʻlarni manbalari va miqdorini tushuniladi.

3. Bundan tashqari, ijtimoiy-mehnat masalalari boʻyicha komissiyaning ish rejasida komissiyaning samarali faoliyat koʻrsatishini taʼminlashga, tegishli darajadagi ijtimoiy sheriklikni rivojlantirishga qaratilgan boshqa masalalar ham nazarda tutilishi mumkin.

Masalan, tegishli vazirlik va idoralar yoki xalqaro tashkilotlar bilan hamkorlik, targʻibot ishlari kabilar.

4. Ijtimoiy-mehnat masalalari boʻyicha komissiya ish rejasiga, taraflarning kelishuviga koʻra, ijtimoiy-mehnat masalalari boʻyicha komissiyaning ish rejasiga oʻzgartish va qoʻshimchalar kiritilishi mumkin.

Ushbu oʻzgartirishlar komissiyaning majlislarida komissiya aʼzolari bilan birga muhokama qilib, amalga oshiriladi.

5. Ijtimoiy-mehnat masalalari boʻyicha komissiya majlislarida nafaqat ish rejasiga kiritilgan masalalar, balki ish rejasiga kiritilmagan qoʻshimcha masalalar ham ijtimoiy sheriklik taraflarining kelishuviga koʻra koʻrib chiqilishi mumkin.