1. Sharhlanayotgan moddada ijtimoiy-mehnat masalalari boʻyicha komissiyalarning majlislarini tashkil etish, ularni chaqirish muddatlari va tartibi, joyi, vaqti, qarorlar loyihalari bilan komissiya aʼzolarini tanishtirish, majlisning vakolati haqidagi tartiblar tushuntirilgan.

Ijtimoiy-mehnat masalalari boʻyicha komissiyalarning majlislari bilan bogʻliq tashkiliy ishlar va tadbirlar shu komissiyalar toʻgʻrisida reglamentda belgilanadi.

Ijtimoiy-mehnat masalalari boʻyicha komissiyalarning majlislari ish rejasiga muvofiq oʻtkazilishi kerak, biroq kalendar yil davomida kamida ikki marta oʻtkaziladi. Yaʼni, kalendar yil davomida ikki martadan koʻproq marta oʻtkazilishi mumkin, faqat kamida ikki marta oʻtkazilishi kerak.

Bu norma komissiyaning faoliyati samaradorligini taʼminlaydi.

2. Sharhlanayotgan moddaning ikkinchi qismida ijtimoiy-mehnat masalalari boʻyicha komissiyaning rejadan tashqari majlisi oʻtkazishning asosiy asoslaridan biri koʻrsatilgan. Unga koʻra, ijtimoiy sheriklik taraflaridan (xodimlar vakili, ish beruvchilar vakili va davlat organi) hech boʻlmaganda bittasining tashabbusi bilan ijtimoiy-mehnat masalalari boʻyicha komissiyaning rejadan tashqari majlisi oʻtkazilishi mumkin.

Rejadan tashqari majlisi deganda ish rejada koʻrsatilmagan boʻlsa-da, taraflarning birining tashabbusi bilan oʻtkaziladigan majlis tushuniladi.

Agar taraflar biri ushbu tashabbus bilan chiqsa, albatta ushbu majlis oʻtkazilishi kerak boʻladi.

Ushbu norma komissiya faoliyatiga oid favqulodda vujudga kelgan holatlarni hal etishga xizmat qiladi.

3. Sharhlanayotgan moddaning uchinchi qismi ijtimoiy-mehnat masalalari boʻyicha komissiya majlislarini oʻz vaqtida va samarali oʻtishiga xizmat qiladi. Chunki komissiya majlislari oʻtkaziladigan joy, sana va vaqt taraflarning kelishuviga koʻra belgilanadi.

Kelishuv har xil tartibda amalga oshirilish mumkin, amaliyotda bu oʻzaro xat almashinuv orqali amalga oshiriladi.

Majlislari oʻtkaziladigan joy, sana va vaqtni taraflar kelishishda aniqlikka eʼtibor qaratish kerak boʻladi. Masalan, joyda aniq manzil, sanasi deganda aniq bitta sana, vaqti deganda soati kelishilishi kerak.

4. Ijtimoiy-mehnat masalalari boʻyicha komissiya qarorlarining tayyorlangan loyihalari komissiya aʼzolariga komissiya majlisini oʻtkazishning tayinlangan sanasidan kamida oʻn kalendar kun oldin tarqatiladi.

Ushbu muddat komissiya aʼzolari uchun aniq tayyorgarlik va tarkib bilan ishtirok etish imkonini beradi.

Agar ijtimoiy-mehnat masalalari boʻyicha komissiya qarorlarining tayyorlangan loyihalari komissiya aʼzolariga komissiya majlisini oʻtkazishning tayinlangan sanasidan kamida oʻn kalendar kun oldin tarqatilmasa, komissiya aʼzolari majlisda ishtirok etmasligi yoki masalalarni hal etishda ovoz bermasligi ham mumkin. Natijada bu komissiyaning qarori qonuniyligini taʼminlamaydi.

5. Har qanday tashkilotlarda boʻlgani kabi ijtimoiy-mehnat masalalari boʻyicha komissiyaning majlisi ham, agar unda komissiya taraflarining har biridan belgilangan komissiya aʼzolarining kamida uchdan ikki qismi hozir boʻlsa, vakolatli hisoblanishi qoida tariqasida belgilangan.