1. Sharhlanayotgan modda Bosh jamoa kelishuvining maqomini ijtimoiy sheriklikning quyidagi xususiyatlarga ega boʻlgan umumrespublika darajasidagi normativ hujjati sifatida belgilaydi:

milliy darajada tuziladi;

mehnat, bandlik va ijtimoiy siyosatning strategik masalalariga daxl qiladi.

Shuningdek, ushbu moddada Bosh jamoa kelishuvi taraflarining quyidagi tarkibini belgilaydi:

aʼzolarining soni eng koʻp boʻlgan respublika kasaba uyushmalari birlashmasi. Hozirgi kunda 5,5 milliondan ortiq aʼzosiga ega boʻlgan Oʻzbekiston kasaba uyushmalari federatsiyasi Bosh jamoa kelishuvida xodimlar vakili sifatida ishtirok etmoqda;

oʻz vakolatli vakillari orqali xodimlarning boshqa respublika birlashmalari;

oʻz vakolatli vakillari orqali ish beruvchilarning respublika birlashmalari. Hozirgi kunda ish beruvchilarning respublika birlashmasi sifatida Oʻzbekiston ish beruvchilar konfederatsiyasi ishtirok etmoqda;

Oʻzbekiston Respublikasi Vazirlar Mahkamasi.

2. Moddaning ikkinchi qismi Bosh jamoa kelishuvning tartibga solish predmetini tavsiflaydi, yaʼni ijtimoiy-iqtisodiy siyosatning asosiy yoʻnalishlarini belgilaydi. Bunga quyidagilar kiradi:

mehnat bozorini tartibga solish va mehnatga haq toʻlash tizimini rivojlantirish;

yangi ish oʻrinlarini yaratish;

kambagʻallikni va norasmiy bandlikni qisqartirish boʻyicha choralar;

aholining ijtimoiy qatlamlarni qoʻllab-quvvatlash mexanizmlari;

mehnat munosabatlarini tartibga solishning tayanch standartlari va ijtimoiy siyosat ustuvorliklari;

davlat va ijtimoiy sheriklarning umumiy majburiyatlari.