Ushbu modda jamoa kelishuvining kuchga kirish tartibini va amal qilish muddatini belgilaydi. Kuchga kirish sanasi taraflar tomonidan belgilanadi. Buning uchta varianti mavjud:

oʻz-oʻzidan (de-fakto) — imzolangan kundan boshlab;

agar aniq koʻrsatilgan boʻlsa, ushbu sanadan boshlab;

ushbu kelishuvda nazarda tutilgan muddat ichida (maʼlum bir voqeaga bogʻliq holatda boʻlishi mumkin). Bu taraflar irodasining mustaqilligi va tartibga solishning moslashuvchanligi tamoyilini amalga oshiradi. Xalqaro amaliyotda kuchga kirish sanasi byudjetning tasdiqlanish sanasi yoki amaldagi kelishuvning tugash vaqti bilan mos kelishi mumkin.

Jamoa kelishuvining amal qilish muddati taraflar tomonidan belgilanadi, biroq eng koʻp muddat — 3 yildir. Bunday cheklov mehnat sharoitlarini muntazam qayta koʻrib chiqish hamda kelishuvlarni iqtisodiy vaziyatga (inflyatsiya, qonunchilikdagi oʻzgarishlar) moslashtirish uchun zarur.

Odatda har qanday shartnoma muddati tugashi bilan oʻz kuchini yoʻqotadi. Biroq jamoa kelishuvida butunlay boshqacha tartib amal qiladi. Agar kelishuv muddati tugashi bilan bekor boʻlganda, xodimlar bir kunda barcha qoʻshimcha imtiyozlardan (ustamalar, qoʻshimcha taʼtillar, moddiy yordamlar) mahrum boʻlib qolgan boʻlardi.

Jamoa kelishuvda koʻrsatilgan muddat (masalan, 3 yil) tugasa-da, tomonlar yangi kelishuv imzolamaguncha, eski hujjatdagi barcha majburiyatlar oʻz kuchida qoladi. Ish beruvchi muddat tugadi degan bahona bilan imtiyozlarni toʻxtatib qoʻya olmaydi.

Taraflar muddat tugashini kutib oʻtirmasdan, amaldagi hujjatni yana bir necha yilga uzaytirishga kelishib olishlari mumkin.

Agar amaldagi kelishuv ikkala tarafni ham toʻliq qanoatlantirsa va yangi muzokaralar oʻtkazishga ehtiyoj boʻlmasa, bu alohida kelishuv yoki bayonnoma bilan rasmiylashtiriladi va xuddi asosiy kelishuv kabi kuchga ega boʻladi.