Jamoa kelishuvlari imzolangan kundan eʼtiboran oʻn kundan kechiktirmay ommaviy axborot vositalarida yoki ular taraflarining rasmiy veb-saytlarida eʼlon qilinishi lozim.
Xabardor qilish tartibida roʻyxatdan oʻtgan hududiy va tarmoq jamoa kelishuvlari ular roʻyxatga olingan kundan eʼtiboran oʻn kundan kechiktirmay Oʻzbekiston Respublikasi Kambagʻallikni qisqartirish va bandlik vazirligining rasmiy veb-saytida eʼlon qilinadi.
Bosh jamoa kelishuvi imzolangan kundan eʼtiboran oʻn kundan kechiktirmay Oʻzbekiston Respublikasi Kambagʻallikni qisqartirish va bandlik vazirligining rasmiy veb-saytida eʼlon qilinadi.
1. Bu norma mehnat munosabatlarida oshkoralik va informatsion ochiqlik tamoyillarini taʼminlashga xizmat qiladi.
Jamoa kelishuvi nafaqat uni imzolagan rahbarlar uchun, balki shu sohada mehnat qilayotgan har bir oddiy xodim uchun moʻljallangan hujjatdir.
Qonunchilik jamoa kelishuvining ijrosini taʼminlash uchun aniq muddat va manzillarni belgilagan, yaʼni 10 kunlik muddat. Bu juda qisqa va tezkor muddat boʻlib, ommaviy axborot vositalarida (gazetalar, jurnallar yoki markaziy telekanallar) yoki rasmiy veb-saytlar (bugungi raqamli davrda eng samarali usul) eʼlon qilinishi lozim.
Ish beruvchilar birlashmasi (vazirlik, uyushma) va Kasaba uyushmasining saytida hujjatning toʻliq matni PDF yoki boshqa formatda joylashtirilishi shart.
Jamoa kelishuvining eʼlon qilinishi bir nechta muhim maqsadlarni koʻzlaydi:
xodimlarni xabardor qilish. Xodim oʻziga tegishli boʻlgan imtiyozlar, ustamalar yoki qoʻshimcha taʼtillar haqida maʼlumotni istalgan vaqtda mustaqil ravishda oʻqiy olishi kerak;
ijtimoiy nazorat. Jamoatchilik, OAV va ekspertlar kelishuv mazmunini tahlil qilishi, undagi ijobiy oʻzgarishlarni kuzatishi mumkin boʻladi;
yangi ish beruvchilar uchun koʻrsatma. Tarmoqdagi boshqa ish beruvchilar ham ushbu kelishuvga qoʻshilishlari mumkin. Buning uchun ular kelishuv matni bilan tanish boʻlishlari lozim.
Garchi eʼlon qilinmaslik kelishuvning kuchini bekor qilmasa-da (chunki u imzolangan kundan kuchga kiradi), bu mehnat qonunchiligining buzilishi hisoblanadi. Buning uchun masʼul shaxslar intizomiy yoki maʼmuriy javobgarlikka tortilishi mumkin.
2. Bu norma jamoa kelishuvlarining ochiqligi va ulardan foydalanish imkoniyatini eng yuqori — respublika darajasiga koʻtaradi. Agar avvalgi moddalarda kelishuv taraflarining (vazirlik yoki uyushma) oʻz saytlarida eʼlon qilishi haqida gap ketgan boʻlsa, bu yerda davlatning markaziy vakolatli organi zimmasiga qoʻshimcha majburiyat yuklanmoqda.
Oʻzbekiston Respublikasi Kambagʻallikni qisqartirish va bandlik vazirligi mehnat sohasidagi davlat siyosatini yurituvchi asosiy organ hisoblanadi.
Xodim yoki ish beruvchi tarmoq kelishuvini qidirib har xil idoralarning saytlarida sarson boʻlmaydi. Barcha hududiy (viloyat miqyosidagi) va tarmoq (soha miqyosidagi) kelishuvlari vazirlikning yagona rasmiy resursida jamlanadi.
Vazirlik saytiga faqat xabardor qilish tartibida roʻyxatdan oʻtgan, yaʼni davlat nazoratidan oʻtgan va qonuniyligi koʻrikdan oʻtkazilgan hujjatlar joylashtiriladi.
MKda belgilangan 10 kunlik muddat davlat organi uchun ham tezkorlik talabini qoʻyadi. Hujjat roʻyxatga olingan kundan boshlab 10 kun ichida saytga chiqishi kerak.
3. Xuddi shuningdek, Bosh jamoa kelishuvi ham imzolangan kundan eʼtiboran oʻn kundan kechiktirmay Oʻzbekiston Respublikasi Kambagʻallikni qisqartirish va bandlik vazirligining rasmiy veb-saytida eʼlon qilinadi.
Bu norma ikkinchi qismda koʻrsatilgan ahamiyatlardan tashqari barcha ijrochilar tomonidan Bosh jamoa kelishuvni ijrosini taʼminlashga xizmat qiladi.
O'zbekiston Respublikasi Kambag'allikni qisqartirish va bandlik vazirligi