1. Ish beruvchi quyidagi hollarda xodimga uning oʻz mehnat majburiyatlarini bajarishi bilan bogʻliq xarajatlarni kompensatsiya qilishi shart:

xizmat safarida boʻlganda (MK 287-modda sharhiga qarang);

sayyor va koʻchib yurish xususiyatiga ega ishlarda, shuningdek dala sharoitlarida yoki vaxta usulida ishlaganda (MK 288-modda sharhiga qarang);

ish beruvchi bilan oldindan kelishuvga koʻra boshqa joydagi ishga koʻchib oʻtganda (MKning 289-moddasi sharhiga qarang);

ish beruvchining yoʻllanmasi bilan kasbiy tayyorgarlikdan, qayta tayyorlash, malaka oshirish va stajirovkadan oʻtganda (MK 290-modda sharhiga qarang);

ishlab chiqarishdagi baxtsiz hodisa yoki kasb kasalligi natijasida xodim vaqtincha mehnatga layoqatsiz boʻlib qolganda (MK 291-modda sharhiga qarang);

xodim majburiy tibbiy koʻrikdan oʻtganligi munosabati bilan (MK 292-modda sharhiga qarang);

xodim ushbu Kodeks 234-moddasi birinchi va ikkinchi qismlariga muvofiq foydalanmagan yillik mehnat taʼtili uchun;

ish beruvchining tashabbusi bilan mehnat shartnomasini bekor qilish toʻgʻrisida xodimni ogohlantirish muddati mutanosib pul kompensatsiyasi bilan almashtirilishi munosabati bilan (MK 165-modda sharhiga qarang).

2. Ushbu moddaning birinchi qismida kompensatsiya toʻlovlarning roʻyxati oxirgi roʻyxat emas, bundan tashqari ish beruvchi xodimlarga MKda, mehnat toʻgʻrisidagi qonunchilikda, jamoa kelishuvlarida, jamoa shartnomasida, shuningdek ish beruvchi tomonidan kasaba uyushmasi qoʻmitasi bilan kelishilgan holda qabul qilinadigan ichki hujjatlarda, mehnat shartnomasida belgilangan boshqa kompensatsiya toʻlovlarni amalga oshirishi shart.

Ushbu moddaning birinchi qismida koʻrsatilgan holatlarda yoki MK va qonunchilikda belgilangan boshqa holatlarda ish beruvchi kompensatsiya toʻlovlarni amalga oshirishga majbur, lekin jamoa kelishuvlarida, jamoa shartnomasida, shuningdek ish beruvchi tomonidan kasaba uyushmasi qoʻmitasi bilan kelishilgan holda qabul qilinadigan ichki hujjatlarda, mehnat shartnomasida boshqa kompensatsiya toʻlovlarni belgilashga majbur emas, ammo belgilangan boʻlsa, ularni toʻlab berishga majbur.

MKda belgilangan boshqa holatlarga MKning 293-moddasida nazarda tutilgan xodimga tegishli mol-mulkdan ish beruvchining manfaatlarini koʻzlab foydalanilganda xarajatlarni kompensatsiya qilish misol qilish mumkin.

Mehnat toʻgʻrisidagi qonunchilikda, jamoa kelishuvlarida, jamoa shartnomasida, shuningdek ish beruvchi tomonidan kasaba uyushmasi qoʻmitasi bilan kelishilgan holda qabul qilinadigan ichki hujjatlarda, mehnat shartnomasida belgilangan boshqa kompensatsiya toʻlovlariga misol sifatida amaliyotda koʻp qoʻllaniladigan xodimlarga ish davrida ovqatlanish va yoʻl kira xarajatlarini kompensatsiya qilishni koʻrsatish mumkin.