Agar ish beruvchining yoʻllanmasi boʻyicha xodimning kasbiy tayyorgarlik, qayta tayyorlash, malaka oshirish va stajirovkadan oʻtishi boshqa joyga koʻchishni talab qilsa, xodimga oʻqish joyiga borish va qaytib kelish, shuningdek uy-joyni ijaraga olish xarajatlarining oʻrni qoplanadi.
Jamoa shartnomasida yoki ish beruvchi tomonidan kasaba uyushma qoʻmitasi bilan kelishilgan holda tasdiqlangan ichki hujjatda kasbiy tayyorgarlik, qayta tayyorlash, malaka oshirish va stajirovkaga yuborilgan xodimlarga yashash joyidan tashqarida yashaganlik uchun kompensatsiya (sutkalik) toʻlovi belgilanishi mumkin.
1. Agar ish beruvchi xodimni yoʻllanma bilan kasbiy tayyorgarlik, qayta tayyorlash, malaka oshirish va stajirovka uchun boshqa shahar yoki hududga yuborsa, qonunga koʻra ish beruvchi xodimning quyidagi xarajatlarini toʻliq qoplashi shart:
yoʻl xarajatlari. Oʻqish yoki stajirovka joyiga borish va qaytish uchun yoʻl chiptalari haqiqiy qiymatda qoplanadi. Har qanday transport turidan foydalanish mumkin (temir yoʻl, avtobus, samolyot va h.k.) va xarajatlar chipta, chek yoki hisob-faktura orqali tasdiqlanishi kerak.
uy-joy ijarasi xarajatlari. Agar oʻqish, malaka oshirish yoki stajirovka boshqa hududda oʻtkazilsa va ish beruvchi xodimga uy-joy taqdim etmasa, ijara haqi ish beruvchi tomonidan qoplanadi.
Agar malaka oshirish yoki stajirovka joyi ish beruvchi bilan bir shaharda boʻlsa, bu norma qoʻllanilmaydi.
Agar xodim oʻz xohishi bilan oʻqishga ketsa va ish beruvchi yoʻllanma bermasa, xarajatlar qoplanmaydi.
2. Agar xodim ish beruvchi yoʻllanmasi bilan kasbiy tayyorgarlik, qayta tayyorlash, malaka oshirish va stajirovkaga boshqa shahar yoki hududga yuborilsa, u holda yashash joyidan tashqarida yashaganlik uchun kompensatsiya (sutkalik) toʻlovi jamoa shartnomasi, kasaba uyushma bilan kelishilgan ichki hujjatda belgilanishi mumkin.
Sutkalik toʻlovning maqsadi — xodimning yashash va kundalik xarajatlarini qoplash.
O'zbekiston Respublikasi Kambag'allikni qisqartirish va bandlik vazirligi