1. Kafolatli toʻlovlar — bu xodim ish beruvchi tomonidan oʻz majburiyatlarini bajara olmagan vaqtda ham pul toʻlashga kafolatlangan toʻlovlardir. Bu toʻlovlar xodimning aybiga bogʻliq boʻlmaydi. Yaʼni, agar xodim ishlayotgan boʻlmasa, lekin qonunchilik yoki ish beruvchi tomonidan belgilangan qonuniy asoslarga koʻra ishdan ozod qilingan boʻlsa, ish haqi oʻrtacha ish haqi yoki tarif stavkasi (maoshi) miqdorida saqlab qolinadi.

Kafolatli toʻlovlar MKning 280-moddasida belgilangan holatlarda amal qiladi.

Mehnat majburiyatlarini bajarishdan ozod qilingan vaqtga misol sifatida, xodim mehnat taʼtilda boʻladi, oʻzini vazifalarini (majburiyatlarini) bajarmaydi, yaʼni MK 216-moddasiga asosan har yilgi dam olish va ishlash qobiliyatini tiklash uchun ishdan ozod etiladi, lekin ish beruvchi buning uchun oʻrtacha ish haqi miqdorida haq toʻlaydi.

Oʻz ixtiyoriga zid tarzda ishlash imkoniyatidan mahrum boʻlgan vaqtga misol sifatida xodim mehnatni muhofaza qilish sohasida oʻquvdan hamda bilim va koʻnikmalar tekshiruvidan yoki majburiy tibbiy koʻrikdan oʻzining aybisiz oʻtmaganligi sababli ishdan chetlashtirilgan davrni aytish mumkin.

2. Kafolatli qoʻshimcha toʻlovlar kafolatli toʻlovlardan farqli ravishda MKda va mehnat toʻgʻrisidagi qonunchilikda belgilangan hollarda xodim muayyan sabablarga koʻra oʻz mehnat vazifalarini umuman bajarmaganda emas, balki toʻliq bajara olmaganda xodimning oʻrtacha ish haqini saqlab qolish maqsadida toʻlanadigan pul summasidir.

Kafolatli toʻlovlar MKning 281-moddasida belgilangan holatlarda amal qiladi.

Kafolatli qoʻshimcha toʻlov miqdori xodimning oʻrtacha ish haqiga teng boʻladi.