1. Sharhlanayotgan moddada xodim muayyan sabablarga koʻra oʻz mehnat vazifalarini toʻliq bajara olmaganda toʻlanadigan kafolatli qoʻshimcha toʻlovlar koʻrsatilgan.

ish beruvchiga va xodimga bogʻliq boʻlmagan sabablarga koʻra bekor turib qolish chogʻida bunday bekor turib qolish davom etgan vaqtga mutanosib ravishda hisoblangan, tarif stavkasining (maoshning) kamida uchdan ikki qismini toʻlashi (MK 266-modda sharhiga qarang);

ish beruvchiga va xodimga bogʻliq boʻlmagan sabablarga koʻra xodim tomonidan mehnat normalari, mehnat (lavozim) majburiyatlari bajarilmaganda xodimning amalda ishlab bergan vaqtiga mutanosib ravishda hisoblangan tarif stavkasining (maoshning) kamida uchdan ikki qismini saqlab qolishi (MK 265-modda sharhiga qarang);

tungi vaqtdagi ish uchun xodimga qoʻshimcha toʻlovni amalga oshirishi (MK 264-modda sharhiga qarang);

dam olish, ishlanmaydigan bayram kunlaridagi va ish vaqtidan tashqari ish uchun oshirilgan miqdorda haq toʻlashi (MK 262, 263-moddalari sharhiga qarang);

oʻzi uchun ish vaqtining qisqartirilgan davomiyligi belgilangan xodimlarga toʻliq ish vaqtida ishlovchi tegishli toifadagi xodimlar uchun nazarda tutilgan mehnatga haq toʻlash miqdorigacha boʻlgan qoʻshimcha toʻlovni amalga oshirishi (MK 258-modda sharhiga qarang);

ushbu Kodeksda nazarda tutilgan ayrim asoslar boʻyicha mehnat shartnomasi bekor qilinganida mazkur Kodeksning 173-moddasining uchinchi qismida belgilangan miqdorda ishdan boʻshatish nafaqasini toʻlashi;

qonunchilikda belgilangan tartibda oʻrtacha ish haqi yoki uning bir qismi miqdorida vaqtinchalik mehnatga layoqatsizlik boʻyicha nafaqa toʻlashi.

Oʻzbekiston Respublikasi Vazirlar Mahkamasining 2024 yil 31 maydagi 314-son qarori bilan tasdiqlangan “Vaqtinchalik mehnatga layoqatsizlik, homiladorlik va tugʻish boʻyicha nafaqalarni hamda yangi tugʻilgan bolani farzandlikka olgan yoki unga vasiy qilib belgilangan xodimga nafaqani tayinlash hamda toʻlash tartibi toʻgʻrisida”gi Nizomning 37-bandiga asosan, vaqtinchalik mehnatga layoqatsizlik boʻyicha nafaqalar oʻrtacha ish haqi hisoblanishi va 38-bandida nafaqaning umumiy summasi kunlik oʻrtacha ish haqini ushbu oyda vaqtinchalik mehnatga layoqatsizlik davrida ishga kelmagan ish kunlari soniga koʻpaytirish yoʻli bilan aniqlanishi koʻrsatilgan.

2. Ushbu moddaning birinchi qismida kafolatli qoʻshimcha toʻlovlardan koʻrsatilgan boʻlib, undan tashqari ish beruvchi xodimlarga MKda, qonunchilikda, jamoa kelishuvlarida, jamoa shartnomasida, shuningdek ish beruvchi tomonidan kasaba uyushmasi qoʻmitasi bilan kelishilgan holda qabul qilinadigan ichki hujjatlarda, mehnat shartnomasida belgilangan boshqa kafolatli qoʻshimcha toʻlovlarni amalga oshirishi shart.

Ushbu moddaning birinchi qismida koʻrsatilgan holatlarda yoki MK va qonunchilikda belgilangan boshqa holatlarda ish beruvchi kafolatli qoʻshimcha toʻlovlarni amalga oshirishga majbur, lekin jamoa kelishuvlarida, jamoa shartnomasida, shuningdek ish beruvchi tomonidan kasaba uyushmasi qoʻmitasi bilan kelishilgan holda qabul qilinadigan ichki hujjatlarda, mehnat shartnomasida boshqa kafolatli qoʻshimcha toʻlovlarni belgilashga majbur emas, ammo belgilangan boʻlsa, ularni toʻlab berishga majbur.