1. Sharhlanayotgan moddaning birinchi qismida xizmat safari tushunchasiga taʼrif berilgan boʻlib, ushbu taʼrifda ayrim shartlar ham nazarda tutilgan. Yaʼni, xizmat safari xodimning ish beruvchi farmoyishiga (buyrugʻiga, qaroriga) binoan boʻlishi kerak va doimiy ish joyidan tashqarida boʻlishi kerak hamda xizmat topshirigʻini bajarish uchun boshqa joyga maʼlum muddatga qiladigan safar boʻlishi kerak.

Xizmat safar muddati, yuboriladigan joy (hudud) va xodim tomonidan bajariladigan topshiriq ish beruvchi farmoyishida aniq koʻrsatiladi.

Xodim Oʻzbekiston Respublikasi hududida xizmat safariga yoki Oʻzbekiston Respublikasi tashqarisiga xizmat safariga yuborilishi mumkin.

Oʻzbekiston Respublikasi Vazirlar Mahkamasining 2022 yil 2 avgustdagi 424-son qarori bilan tasdiqlangan “Oʻzbekiston Respublikasi hududida xizmat safarlari toʻgʻrisida”gi Nizom hamda “Davlat organlari va tashkilotlari xodimlari Oʻzbekiston Respublikasi tashqarisiga xizmat safariga yuborilganda xizmat safari xarajatlari uchun mablagʻlar berish tartibi toʻgʻrisida”gi Nizom (roʻyxat raqami 2730, 2015 yil 19 noyabr) xizmat safariga oid qonunosti hujjatlar hisoblanadi.

2.1. Xizmat safariga yuborilgan taqdirda ish beruvchi xodimga quyidagilarni qoplashi shart:

2.2.yoʻlkira xarajatlari. Yoʻl haqi – xizmat safariga borish va qaytish xarajatlaridir. Transport turi ish beruvchi bilan kelishilgan boʻlishi kerak (avtobus, poyezd, samolyot, shaxsiy yoki xizmat avtomobili).

Shuningdek, shahar ichidagi yoʻl xarajatlari (taksi, metro, avtobus) ham qoplanadi, agar ular xizmat topshirigʻini bajarish bilan bogʻliq boʻlsa. Ushbu xarajatlarni tasdiqlovchi chipta, cheklar taqdim qilinishi lozim;

2.3.turar-joy ijarasi xarajatlari. Xizmat safari davomida mehmonxona, xostel, kvartira yoki boshqa turar-joy uchun xarajatlar qoplanadi. Xarajatlar isbotlanishi uchun chek, hisob-faktura yoki shartnoma taqdim etilishi kerak;

2.4.doimiy yashash joyidan tashqarida yashash bilan bogʻliq qoʻshimcha xarajatlar (sutkalik). Sutkalik – xodimning xizmat safari davomida kunlik ehtiyojlari uchun toʻlanadigan toʻlov. Unga ovqatlanish, xizmat vazifasini bajarish bilan bogʻliq shaxsiy sarflarni kiradi. Sutkalikning minimal va maksimal miqdori qonunchilikda yoki kasaba uyushmasi qoʻmitasi bilan kelishilgan holda qabul qilingan ichki hujjatlar bilan belgilanishi mumkin.

2.5.xodim tomonidan ish beruvchining ruxsati yoki roziligi bilan qilingan boshqa xarajatlar. Bunday xarajatlarga hujjatlar nusxasi va koʻchirmalarini olish, rasmiy yigʻilishlar va konferentsiyalarda ishtirok badali, qoʻshimcha aloqa xarajatlari (telefon, internet), xizmat maqsadida shaxsiy avtomobildan foydalanish xarajatlari va hokazolarni misol qilish mumkin.

3. Xizmat safarlari bilan bogʻliq xarajatlarning oʻrnini qoplash miqdorlari jamoa shartnomasi yoki ish beruvchi tomonidan kasaba uyushmasi qoʻmitasi bilan kelishilgan holda qabul qilingan ichki hujjat bilan belgilanadi. Ushbu miqdorlarni belgilashda korxona faoliyati, moliyaviy imkoniyatlarini inobatga olish tavsiya etiladi.

Xizmat safari xarajatlarini qoplash miqdorlari byudjetdan moliyalashtiriladigan tashkilotlar uchun Oʻzbekiston Respublikasi Vazirlar Mahkamasining 2022 yil 2 avgustdagi 424-son qarori bilan tasdiqlangan “Oʻzbekiston Respublikasi hududida xizmat safarlari toʻgʻrisida”gi Nizomda belgilangan miqdorlardan kam boʻlmasligi kerak.