Agar vaqtincha mehnatga qobiliyatsizlik ishlab chiqarishdagi baxtsiz hodisa yoki kasb kasalligi natijasida yuz bersa, ish beruvchi xodimga vaqtincha mehnatga qobiliyatsizlik nafaqasini toʻlash bilan birga uning tibbiy, ijtimoiy va kasbiy reabilitatsiya uchun qilgan xarajatlarining oʻrnini tegishli hujjatlar (cheklar, maʼlumotnomalar va boshqalar) bilan tasdiqlangan, haqiqatda qilingan xarajatlar miqdoridan kam boʻlmagan miqdorda qoplaydi.
Ish beruvchi ishlab chiqarishdagi baxtsiz hodisa natijasida vaqtincha mehnatga qobiliyatsiz boʻlsa hamda kasb kasalligi sababli vaqtincha ishlay olmasa xodimning xarajatlarini qoplashi shart:
vaqtincha mehnatga qobiliyatsizlik nafaqasi. Ish beruvchi xodimga vaqtincha ishlay olmagan davr uchun nafaqa toʻlaydi. Bu nafaqa miqdori MK va Vazirlar Mahkamasining 2024 yil 31 maydagi 314-son qarori bilan tasdiqlangan “Vaqtinchalik mehnatga layoqatsizlik, homiladorlik va tugʻish boʻyicha nafaqalarni hamda yangi tugʻilgan bolani farzandlikka olgan yoki unga vasiy qilib belgilangan xodimga nafaqani tayinlash hamda toʻlash tartibi toʻgʻrisida”gi Nizom bilan tartibga solinadi.
tibbiy, ijtimoiy va kasbiy reabilitatsiya xarajatlari. Ish beruvchi xodimga davolanish xarajatlari (statsionar va ambulator), dori vositalari, reabilitatsiya kurslari, sotsial yordam vositalari (protez, ortopedik jihozlar, arobachalar va h.k.), kasbiy qayta tayyorlash va reabilitatsiya xarajatlarini qoplab berishi shart (MKning 325-modda sharhiga qarang).
Ish beruvchi qoplash uchun quyidagi hujjatlarni talab qilishi mumkin:
dori vositalari, davolanish yoki protez xarajatlariga oid cheklar;
tibbiy muassasalardan hisob-fakturalar yoki maʼlumotnomalar;
reabilitatsiya yoki qayta tayyorlash kurslariga yoʻllanmalar;
davolanish haqidagi shifokorning xulosalari.
O'zbekiston Respublikasi Kambag'allikni qisqartirish va bandlik vazirligi