MK 285-moddasida kompensatsiya toʻlovlariga qaysi toʻlovlar kiritish mumkinligi belgilangan boʻlib, unga koʻra xodim ish jarayonida sarflagan yoki uning mehnat majburiyatlarini bajarish bilan bogʻliq barcha xarajatlar ish beruvchi tomonidan qoplanishi nazarda tutilmoqda.

Shu bilan birga ushbu moddada bir shart borki, bunda ish beruvchi kompensatsiya toʻlovlarni toʻlashi uchun ular mehnat toʻgʻrisidagi qonunchilikda va mehnat haqidagi boshqa huquqiy hujjatlarda nazarda tutilgan boʻlishi kerak (MK 10 va 12-moddalar sharhiga qarang).

Kompensatsiya qilinadigan xarajatlar xodimlar oʻz hisobidan toʻlangan yoki toʻlanmaganligidan qatʼiy nazar qoplanishi kerak, ammo bu xarajatlar xodimning mehnat majburiyatlarining yoki boshqa majburiyatlarning bajarilishi bilan bogʻliq boʻlishi kerak.

Shuningdek, ushbu xarajatlar nafaqat pul koʻrinishida balki vaqt yoki boshqa koʻrinishlarda boʻlishi mumkin. Masalan, MKning 286-moddasi birinchi qismida koʻrsatilgan foydalanmagan yillik mehnat taʼtili uchun yoxud ish beruvchining tashabbusi bilan mehnat shartnomasini bekor qilish toʻgʻrisida xodimni ogohlantirish muddati mutanosib pul kompensatsiyasi bilan almashtirilishi munosabati bilan toʻlanadigan kompensatsiyalarni koʻrsatish mumkin.