1. Yuridik shaxsni qayta tashkil etish (qoʻshib yuborish, qoʻshib olish, boʻlish, ajratib chiqarish, oʻzgartirish) chogʻida yoki qayt tashkil etilgandan keyin ham jamoa shartnomasining amal qilinishi saqlanib qolinadi. Bu xodimlarning ijtimoiy va mehnat huquqlari uzluksizligi uchun muhim ahamiyat kasb etadi.

Qayta tashkil etishni amalga oshirish davrida jamoa shartnomasining barcha qoidalari amal qilishda davom etadi va ish beruvchi (yoki yangi tuzilma) uning qoidalarini toʻxtatib turishga, qayta koʻrib chiqishga yoki eʼtiborsiz qoldirishga haqli emas.

Yoʻl qoʻyiladigan qayta tashkil etish shakllari Fuqarolik kodeksining 55-moddasida keltirilgan. Ushbu norma xodimlarni qayta tashkil etish orqali shartnoma majburiyatlarini "nollashtirish"dan himoya qiladi - ayniqsa, yangi yuridik shaxslar qoʻshib yuborilganda yoki ajralib chiqqanda.

2. Sharhlanayotgan moddaning ikkinchi qismi qayta tashkil etish (yangi tuzilmani roʻyxatdan oʻtkazish) tugagandan soʻng, jamoa shartnomasini qayta koʻrib chiqishni nazarda tutadi.

Shunda, ish beruvchi yoki xodimlarning vakillari (shu jumladan kasaba uyushmalari) jamoa shartnomaning shartlarini qayta koʻrib chiqishni taklif qilishga yoki amaldagi shartnomaning butunlay saqlanib qolishini tasdiqlashga haqli, ammo buning muddati belgilangan, yaʼni bir oy ichida ushbu huquqdan foydalanishi mumkin.

Agar ushbu muddat oʻtib ketsa, jamoa shartnomani amal qilishi davom etadi.

Bunday holatda jamoa shartnomaga oʻzgartirishlar kiritish yoki toʻldirish umumiy tartibda amalga oshiriladi.