Sharhlanayotgan moddada jamoa shartnomasini kuchga kirish vaqti, amal qilish muddati va amal qilish muddatini uzaytirish haqidagi normalar koʻrsatilgan.

Jamoa shartnomasi ikki xil tartibda kuchga kiradi. Birinchisi, imzolangan kundan eʼtiboran, ikkinchisi jamoa shartnomasida belgilangan kundan eʼtiboran.

Jamoa shartnomasini amal qilish muddati ham ikki xil boʻladi. Birinchisi, shartnomada nazarda tutilgan muddat ichida. Bu muddat uch yildan oshmasligi kerak. Ikkinchisi, agar jamoa shartnomasida amal qilish muddati koʻrsatilmagan boʻlsa, uch yil amal qiladi.

Mazkur uch yilgacha yoki uch yillik muddat tugagach, jamoa shartnomasi taraflar yangi shartnoma tuzguniga yoki amaldagi jamoa shartnomasini oʻzgartirguniga, toʻldirguniga qadar amal qiladi. Yaʼni, jamoa shartnomasi muddati tugagandan keyin undagi normalar yangi jamoa shartnoma belgilangan tartibda imzolanib, kuchga kirgunga qadar amal qiladi.

Agar jamoa shartnomasiga oʻzgartirish kiritish yoki toʻldirishga ehtiyoj boʻlsa, ushbu oʻzgartirish yoki toʻldirish amalga oshirilgunga qadar oldingi jamoa shartnomaga amal qilinadi.

Jamoa shartnomasining eng koʻp amal qilish muddati 3 yil etib belgilangan boʻlsa, ushbu muddat tugagunga qadar uni yana MKning 70-moddasi talablariga rioya etgan holda amal qilish muddati uzaytirilishi mumkin.

Uzaytirilganda ham uch yillik muddatga rioya etish kerak.

XALQARO STANDARTLAR

XMTning Jamoa muzokaralariga koʻmaklashish toʻgʻrisidagi 154-sonli Konventsiyasi (Oʻzbekiston tomonidan ratifikatsiya qilingan) tomonlarning kelishuvlar amal qilish muddatini mustaqil belgilash huquqini tan oladi, shuningdek jamoaviy shartnomalar qayta koʻrib chiqilgunga qadar ularning uzluksizligini qoʻllab-quvvatlaydi.