Tashkilotning mulkdori oʻzgarganda jamoa shartnomasining amal qilishi olti oy mobaynida saqlab qolinadi. Bu davrda taraflarning yangi jamoa shartnomasini tuzish yoxud amaldagisini saqlab qolish, unga oʻzgartish va (yoki) qoʻshimchalar kiritish haqida muzokaralar boshlashga haqli.
Jamoa shartnomasini qayta koʻrib chiqish chogʻida avvalgi jamoa shartnomasida xodimlar uchun nazarda tutilgan imtiyozlarni saqlab qolish mumkinligi haqidagi va boshqa shartlarni bajarish toʻgʻrisidagi masala koʻrib chiqiladi.
1. Ushbu modda mulkdor oʻzgarganda jamoa shartnomasining taqdirini tartibga soladi, bu esa xususiylashtirish, sotish, aktsiyadorlik yoki korporativ qoʻshib olish sharoitida xodimlarni himoya qilish uchun juda muhimdir.
Ushbu normaning asosiy maqsadi mulk huquqi boshqa shaxsga oʻtganda xodimlarning ijtimoiy va mehnat kafolatlari oʻz-oʻzidan yoʻqolib ketishining oldini olishdan iborat.
Birinchi qismda jamoa shartnomasining 6 oy muddatga saqlanishi mustahkamlab qoʻyilgan. Bu imperativ kafolatdir, mulkdor almashgan (mulk huquqining boshqa shaxsga oʻtishi davlat roʻyxatidan oʻtkazilgan) paytdan eʼtiboran jamoa shartnomasi yangi mulkdorning xohish-irodasidan qatʼi nazar, kamida 6 oy toʻliq hajmda amal qilishda davom etadi.
Ushbu muddat davomida yangi mulkdor jamoa shartnomasining barcha qoidalariga rioya qilishi shart, bunda shartnomani oʻzgartirish tartibiga rioya qilmasdan toʻlovlarni qisqartirishga, imtiyozlarni bekor qilishga, ish rejimini oʻzgartirishga yoʻl qoʻyilmaydi.
Ushbu qoida mulkchilikning barcha shakllariga, shu jumladan mol-mulkning bir yuridik shaxsdan boshqasiga, davlatdan xususiy mulkka oʻtishi (xususiylashtirish), bankrotlik va keyinchalik aktivlarni yangi investorga oʻtkazish chogʻida ham qoʻllaniladi.
Qonun, agar korxonaning tuzilishi, maqsadlari yoki siyosati oʻzgargan boʻlsa, amaldagi shartnomani tasdiqlash toʻgʻrisida, oʻzgartirishlar va (yoki) qoʻshimchalar kiritish toʻgʻrisida yangi shartnoma tuzish boʻyicha jamoaviy muzokaralarni boshlash imkoniyatini beradi (majburiyat emas). Biroq tomonlar muzokaralarni boshlamagan, kelishuvga erishmagan va yangi shartnoma tuzmagan boʻlsa, amaldagi shartnoma oʻz kuchini saqlab qoladi.
2. Moddaning ikkinchi qismida jamoa shartnomasini qayta koʻrib chiqishda imtiyozlarni (qoʻshimcha toʻlovlar, kompensatsiyalar, kafolatlar) saqlab qolish masalasi ijtimoiy-mehnat masalalari boʻyicha komissiya tomonidan muhokama qilinishi va xodimlarning vakillari bilan kelishilishi kerakligi koʻrsatilgan.
Bu yangi mulkdorga imtiyozlardan voz kechishni asoslash va iqtisodiy holatni hisobga olish, shu bilan birga adolat va shaffoflik tamoyillariga rioya qilish boʻyicha ijtimoiy majburiyat yuklaydi.
Shuningdek, jamoa shartnomasini qayta koʻrib chiqish chogʻida boshqa shartlarni (yaʼni, amaldagi jamoa shartnomasida mavjud boʻlmagan) bajarish toʻgʻrisidagi masala koʻrib chiqiladi. Ushbu shartlarni kiritish taklifi ikki tarafda ham boʻlishi mumkin.
O'zbekiston Respublikasi Kambag'allikni qisqartirish va bandlik vazirligi