Sharhlanayotgan modda tashkilot rahbari, uning oʻrinbosarlari, tashkilot bosh buxgalteri va tashkilot alohida boʻlinmalarining rahbari boshqa ish beruvchida (boshqa tashkilotda) oʻrindoshlik asosida ishlashining sharti koʻrsatilgan, yaʼni faqat tashkilotning vakolatli organi yoki tashkilot mulkdori yoxud mulkdor vakolat bergan shaxs (organ) ruxsati bilan oʻrindoshlik asosida ishlashi mumkin.

Ushbu norma talabidan kelib chiqib, tashkilotning oʻzida ichki oʻrindoshlikni cheklamaydi faqat boshqa ish beruvchida, yaʼni tashqi oʻrindoshlik asosida ishlashga shart qoʻyilgan.

Shuningdek, Vazirlar Mahkamasining 2012 yil 18 oktyabrdagi 297-son qarori ilovasi 4-bandiga muvofiq Oʻzbekiston Respublikasi Prezidenti Administratsiyasi va Oʻzbekiston Respublikasi Bosh vaziri kotibiyati va Bosh vazir oʻrinbosarlari kotibiyatlari xodimlari (texnik va xizmat koʻrsatuvchi xodimlardan tashqari), davlat boshqaruvi organlari rahbarlari, ularning oʻrinbosarlari va tarkibiy boʻlinmalar boshliqlari, Qoraqalpogʻiston Respublikasi Vazirlar Kengashi Raisi va aʼzolari (Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining qarorlarida nazarda tutilgan hollar bundan mustasno), viloyatlar, tumanlar va shaharlar hokimlari va ularning oʻrinbosarlari, bir-biriga boʻysunuvchi yoki bir-birining nazoratidagi tashkilotlarda davlat boshqaruvi organlari mutaxassislari (sogʻliqni saqlashni boshqarish organlarida band boʻlgan vrachlar va taʼlimni boshqarish organlarida band boʻlgan oʻqituvchilar bundan mustasno) ga oʻrindoshlik asosida ishlash taqiqlanadi. Bunda faqat ilmiy faoliyatni yoki oʻqituvchilik faoliyatini amalga oshirishga cheklov yoʻq.

Ushbu cheklovlar qoʻyilishidan maqsad:

moliyaviy manfaatlar toʻqnashuvini oldini olish, rahbar oʻz lavozimidagi vakolatlarini boshqa tashkilot foydasiga ishlatmasligi uchun;

xavfsizlik va maxfiylikni taʼminlash, kommertsiya sirlari va moliyaviy maʼlumotlar boshqa tashkilotga chiqib ketmasligi uchun;

asosiy ishda samaradorlikni oshirish, rahbar va boshqaruvchi shaxslar oʻz asosiy vazifasiga toʻliq eʼtibor qaratishi uchun.

Ruxsat olish qonunchilikda yoki ichki hujjatlarda belgilangan umumiy tartibda yozma ravishda olinadi.

MISOLLAR

Aktsiyadorlik jamiyati direktori.

AJ direktori boshqa tashkilotda maslahatchi sifatida ishlamoqchi.

Bu holda aktsiyadorlar umumiy yigʻilishi yoki koʻpincha kuzatuv kengashi yozma ruxsat berishi shart.

Ruxsatsiz ishga joylashsa, mehnat intizomi buzilishi hisoblanadi.

Davlat tashkiloti (vazirlik) bosh buxgalteri.

Davlat tashkiloti bosh buxgalteri boshqa korxonada hisobchi sifatida ishlashni xohlaydi. Buning uchun ushbu davlat tashkilotining yuqori turuvchi vakolatni organni ruxsati bilan boshqa tashkilotda oʻrindoshlik asosida ishlashi mumkin.