499-modda · VI bo'lim · Ayrim toifadagi xodimlar mehnatini huquqiy jihatdan tartibga solishning oʻziga xos xususiyatlari
Vaqtinchalik xodim ish beruvchini uch kalendar kun oldin yozma shaklda ogohlantirib, mehnat shartnomasini oʻz tashabbusiga koʻra bekor qilishga haqli.
Ish beruvchi tashkilotning (uning alohida boʻlinmasining) tugatilishi (ushbu Kodeks 161-moddasi ikkinchi qismining 1-bandi), xodimlar sonining yoki shtatining oʻzgarishi munosabati bilan (ushbu Kodeks 161-moddasi ikkinchi qismining 2-bandi), shuningdek xodimning malakasi yetarli boʻlmaganligi sababli bajarayotgan ishiga nomuvofiqligi munosabati bilan (ushbu Kodeks 161-moddasi ikkinchi qismining 3-bandi) mehnat shartnomasini muddatidan ilgari bekor qilish xususidagi oʻz niyati toʻgʻrisida vaqtinchalik xodimni kamida uch kalendar kun oldin yozma shaklda, imzo qoʻydirib ogohlantirishi shart.
Vaqtinchalik xodim bilan tuzilgan mehnat shartnomasi vaqtinchalik xodimning aybli harakatlari (harakatsizligi) bilan bogʻliq asoslarga koʻra bekor qilingan taqdirda, vaqtinchalik xodim oʻzi bilan tuzilgan mehnat shartnomasi bekor qilinishidan kamida bir kun oldin yozma shaklda ogohlantiriladi.
Vaqtinchalik xodimni ushbu moddaning ikkinchi va uchinchi qismida nazarda tutilgan yozma ravishdagi ogohlantirish oʻrniga ish beruvchi unga mutanosib pulli kompensatsiya toʻlashga haqli.
Agar jamoa shartnomasida yoki mehnat shartnomasida boshqacha qoida belgilanmagan boʻlsa, vaqtinchalik xodimga mehnat shartnomasi bekor qilinganda ishdan boʻshatish nafaqasi toʻlanmaydi.
1. Vaqtinchalik xodim ham mavsumiy xodim singari ish beruvchini uch kalendar kun oldin yozma shaklda ogohlantirib, mehnat shartnomasini oʻz tashabbusiga koʻra bekor qilishga haqli.
MKning 160-moddasida koʻrsatilgan mehnat shartnomasini xodimning tashabbusiga koʻra bekor qilishda ogohlantirish muddatidan boshqa barcha umumiy qoidalar qoʻllaniladi (MKning 160-moddasi sharhiga qarang).
2. Vaqtinchalik xodim bilan tuzilgan mehnat shartnomani ish beruvchi tashabbusi bilan bekor qilishda umumiy qoidalardan tashqari oʻziga xos xususiyatlari mavjud.
Ish beruvchi tashkilot (uning alohida boʻlinmasi) tugatilishi munosabati bilan (MKning 161-moddasi ikkinchi qismining 1-bandi), shuningdek xodimlarning soni yoki shtati oʻzgarishi munosabati bilan (MKning 161-moddasi ikkinchi qismining 2-bandi), xodimni malakasi yetarli boʻlmaganligi sababli bajarayotgan ishiga nomuvofiqligi munosabati bilan (MKning 161-moddasi ikkinchi qismining 3-bandi) mehnat shartnomasini muddatidan ilgari bekor qilish xususidagi oʻz niyati toʻgʻrisida vaqtinchalik xodimni kamida uch kalendar kun oldin yozma shaklda, imzo qoʻydirib ogohlantirishi shart.
3. Vaqtinchalik xodim bilan tuzilgan mehnat shartnomasi xodimning aybli harakatlari (harakatsizligi) bilan bogʻliq asoslarga koʻra, yaʼni xodimning oʻz mehnat majburiyatlarini muntazam ravishda buzganligi yoki xodimning oʻz mehnat majburiyatlarini bir marta qoʻpol ravishda buzganligi sababli (MKning 161-moddasi ikkinchi qismining 4 va 5-bandlari) bekor qilingan taqdirda, vaqtinchalik xodim oʻzi bilan mehnat shartnomasi bekor qilinishidan kamida bir kun oldin yozma shaklda ogohlantiriladi.
4. Vaqtinchalik xodimni mehnat shartnomasini bekor qilishdan oldin ogohlantirish oʻrniga ish beruvchi unga mutanosib pulli kompensatsiya toʻlashga haqli. Buning uchun xodimning roziligi shart emas.
Pullik kompensatsiyaning miqdori xodimning ish haqidan kelib chiqib hisoblanadi.
5. Vaqtinchalik xodimga mehnat shartnomasi bekor qilinganda oʻziga xos xususiyatlaridan biri bu ishdan boʻshatish nafaqasi toʻlanmaydi. Agar jamoa shartnomasida yoki mehnat shartnomasida boshqacha qoida nazarda tutilgan boʻlsa toʻlanishi mumkin.
Chunki vaqtinchalik xodim boʻlganligi sababli koʻpi bilan ikki oyga ishga qabul qilingan boʻladi, bu bir kun yoki ikki kun ham boʻlishi mumkin.
O'zbekiston Respublikasi Kambag'allikni qisqartirish va bandlik vazirligi