1. Sharhlanayotgan moddada xizmat tekshiruvining yakunlovchi hujjati dalolatnomani rasmiylashtirish tartibi va unda aks ettirilishi lozim boʻlgan maʼlumotlarni mufassal belgilaydi.

Dalolatnoma ovoz berish yoʻli bilan qabul qilingan qaror asosida komissiya aʼzolari tomonidan imzolanadi. Agar aʼzolardan biri qarorga rozi boʻlmasa, u oʻzining alohida fikrini yozma ravishda bayon etish huquqiga ega, bu esa xizmat tekshiruvining xolisligini taʼminlashga xizmat qiladi.

2.1. Shuningdek, ushbu moddada dalolatnomada aks ettirilishi shart boʻlgan asosiy maʼlumotlar roʻyxati aniq bayon etilgan. Ushbu maʼlumotlar tekshiruv natijalari asosida ish beruvchi tomonidan intizomiy jazo choralari koʻrilishida hal qiluvchi ahamiyatga ega boʻladi.

2.2. Dalolatnomada oʻziga nisbatan xizmat tekshiruvi oʻtkazilgan xodim toʻgʻrisidagi (xodimning familiyasi, ismi, otasining ismi, u bajarayotgan ish (egallagan lavozim), ushbu ish beruvchidagi ish staji, ilgari sodir etilgan intizomiy huquqbuzarliklar uchun intizomiy jazoning mavjudligi yoki mavjud emasligi haqidagi maʼlumotlar) maʼlumotlar koʻrsatilishi kerak.

Ushbu maʼlumotlar agar xodimning ijtimoiy qilmish sodir etganligi tasdiqlansa, ish beruvchi tomonidan tegishli chora koʻrish uchun muhim ahamiyatga ega.

2.3. Dalolatnomada xizmat tekshiruvini oʻtkazgan komissiya tarkibi toʻgʻrisidagi maʼlumotlar koʻrsatilishi kerak. Ushbu maʼlumotlar komissiya tarkibini shakllantirishda MKning 304-moddasi talablariga rioya etilganligiga aniqlik kiritadi.

2.4. Dalolatnomada xizmat tekshiruvini oʻtkazish asoslari haqidagi maʼlumotlar koʻrsatilishi kerak.

MKning 303-moddasi birinchi qismiga koʻra xizmat tekshiruvi oʻtkazish toʻgʻrisida qaror qabul qilish uchun ommaviy axborot vositalarining xabarlari, xodimning bevosita rahbarining bildirgisi, jismoniy va yuridik shaxslarning murojaatlari hamda xodim tomonidan intizomiy qilmish sodir etilgan deb taxmin qilish uchun asos beradigan boshqa maʼlumotlar asos boʻladi.

2.5. Dalolatnomada xodim intizomiy qilmish sodir etganligi faktining mavjudligi yoki mavjud emasligi toʻgʻrisidagi maʼlumotlar koʻrsatilishi kerak. Chunki xizmat tekshiruvini oʻtkazishning maqsadi ham xodim intizomiy qilmish sodir etganligi yoki sodir etmaganligini aniqlash hisoblanadi.

2.6. Dalolatnomada intizomiy qilmish sodir etilganligi faktini tasdiqlovchi hujjatlar haqidagi maʼlumotlar koʻrsatilishi kerak.

Agar dalolatnomada intizomiy qilmish sodir etilganligi faktini tasdiqlovchi hujjatlar haqidagi maʼlumotlar boʻlmasa, aniqlangan holatlarni isbotlashda muammolar vujudga keladi.

Masalan, xodim tomonidan yoki boshqa xodimlar tomonidan bajarilgan ishlarni tasdiqlovchi va rasmiylashtirgan hujjatlari boʻlishi mumkin.

2.7. Dalolatnomada oʻziga nisbatan xizmat tekshiruvi oʻtkazilgan xodimning tushuntirishlarida koʻrsatilgan vajlar toʻgʻrisidagi maʼlumotlar aniq koʻrsatilishi kerak. Agar aniq koʻrsatilmasa, ushbu xodimning noroziligiga va xizmat tekshiruvi xolislik bilan oʻtkazilganligini shubha boʻladi. Ushbu holat mehnat nizolariga sabab boʻlishi mumkin.

Tushuntirishlarida koʻrsatilgan vajlar deganda xodim oʻzining tushuntirish xatida aybsizligini isbotlashga qaratilgan holatlar va dalillarni tushunish mumkin.

2.8. Dalolatnomada xodimning intizomiy qilmish sodir etganligi holatlari va uning oqibatlari haqidagi aniq maʼlumotlar koʻrsatilishi kerak.

Xodimning intizomiy qilmish sodir etganligi holatlari va uning oqibatlariga misol qilib, xodimning harakatlari yoki harakatsizligi hamda buning natijasida tashkilotga yoki boshqalarga yetkazilgan zararlar yoki boshqa xodimlarning huquqlarini buzilishi va hokazolarni tushunish mumkin.

2.9. Dalolatnomada xodimning oʻz mehnat majburiyatlarini bajarmaganligi yoki lozim darajada bajarmaganligi uchun uning aybdorligini tasdiqlovchi yoki istisno etuvchi materiallar toʻgʻrisidagi maʼlumotlar koʻrsatilishi kerak.

MISOL

Korxonada bir uskuna ishdan chiqqan, ushbu uskunada 4 nafar xodim ishlaydi, ish beruvchining gumoni ushbu 4 nafar xodimdan faqat bittasi, yaʼni A. ismli xodimda. Chunki boʻlim boshligʻining bildirgisida shu xodim koʻrsatilgan.

Xizmat tekshiruvi davomida video kuzatuvdagi tasvirlar oʻrganilganda xodim uskunani ishlash qoidalariga rioya etmaganligi aniqlandi. Ushbu holatda video tasvirlar A. ismli xodimning aybdorligini tasdiqlovchi material hisoblanadi.

2.10. Oʻtkazilgan xizmat tekshiruvlari natijasida sodir etilgan intizomiy qilmish natijasida xodim tomonidan ish beruvchiga zarar yetkazgan boʻlsa, ushbu yetkazilgan zararning xususiyati va miqdori haqidagi maʼlumotlar dalolatnomada aniq koʻrsatilishi kerak.

Chunki ish beruvchi ushbu xodimni nafaqat intizomiy javobgarlikka balki moddiy javobgarlikka ham tortishi mumkin. Shu sababli xizmat tekshiruvi oʻtkazilgandan keyin ish beruvchi yana yetkazilgan zarar miqdorini aniqlash uchun komissiya tuzishi kerak emas.

Agar zarar miqdorini va xususiyatini aniqlash uchun mutaxassislar kerak boʻlsa, komissiyaning mutaxassislarni shartnoma asosida jalb etish toʻgʻrisida ish beruvchiga iltimosnoma kiritishi mumkin.

3. Ushbu qoida xizmat tekshiruvi natijalari toʻgʻrisidagi dalolatnomaning yakunlovchi qismida nimalar aks ettirilishi kerakligini belgilaydi. Dalolatnomaning bu qismi eng muhim hisoblanadi, chunki unda komissiyaning xulosalari, takliflari va tavsiyalari bayon etiladi. Dalolatnomaning yakunlovchi qismi ish beruvchi uchun xodimga nisbatan qanday chora koʻrish kerakligi haqida qaror qabul qilish uchun asos boʻladi.

Dalolatnomada komissiyaning xizmat tekshiruvi natijalari boʻyicha kelgan xulosalari aniq va loʻnda shaklda bayon etilishi kerak. Xulosalar dalillarga asoslangan boʻlishi va tekshiruvning maqsadiga javob berishi lozim.

Agar xizmat tekshiruvi natijasida xodim tomonidan intizomiy qilmish sodir etilganligi fakti tasdiqlansa, dalolatnomada xodimni intizomiy javobgarlikka tortish toʻgʻrisida ish beruvchiga yoʻllangan takliflar boʻlishi kerak. Taklifda qonunchilikka muvofiq qoʻllanilishi mumkin boʻlgan intizomiy jazo turi koʻrsatilishi mumkin.

Agar xizmat tekshiruvi natijasida xodim ish beruvchiga haqiqatdan toʻgʻridan-toʻgʻri zarar yetkazganligi fakti aniqlansa, dalolatnomada xodimni moddiy javobgarlikka tortish toʻgʻrisida ish beruvchiga yoʻllangan takliflar boʻlishi kerak. Taklifda zarar miqdori va uni qoplash tartibi koʻrsatilishi mumkin.

Dalolatnomada mehnat intizomini kuchaytirishga, xodimlar tomonidan intizomiy qilmishlar sodir etishga imkon beradigan sabablar va shart-sharoitlarni bartaraf etishga qaratilgan, profilaktika xususiyatiga ega boʻlgan tavsiyalar mavjud boʻlishi kerak. Bunday tavsiyalar tashkilotda mehnat intizomini mustahkamlashga va kelgusida intizomiy qilmishlarning oldini olishga yordam beradi.

Barcha xulosalar, takliflar va tavsiyalar dalillarga asoslangan boʻlishi va qonunchilikka zid boʻlmasligi hamda aniq va tushunarli shaklda bayon etilishi kerak.

4. Xizmat tekshiruvi xodimning foydasiga hal boʻlgan holatlarda dalolatnomaning yakunlovchi qismida xodimga nisbatan asossiz shubhalar yoki uning ishiga toʻsqinlik qilayotgan sabablarni aniqlash va bayon etish muhimdir. Bu xodimning obroʻsini tiklashga va kelgusida bunday holatlarning oldini olishga yordam beradi.

Dalolatnomada komissiyaning xodim tomonidan intizomiy qilmish sodir etilmaganligi yoki uning oʻz mehnat majburiyatlarini bajarmaganligi yoki lozim darajada bajarmaganligi uchun aybi yoʻqligi toʻgʻrisidagi xulosasi aniq va loʻnda shaklda bayon etilishi kerak.

Agar xizmat tekshiruvi xodimga nisbatan asossiz shubhalar boʻlganligini aniqlasa, dalolatnomada bu shubhalanishga imkon bergan sabablar koʻrsatilishi kerak. Bu sabablar turlicha boʻlishi mumkin, masalan, notoʻgʻri maʼlumot, tushunmovchilik yoki shaxsiy adovat.

Agar xizmat tekshiruvi xodimning oʻz mehnat majburiyatlarini bajarishiga monelik qilayotgan sabablar mavjudligini aniqlasa, dalolatnomada bu sabablar koʻrsatilishi kerak. Bu sabablar ham turlicha boʻlishi mumkin, masalan, yetarli sharoitlarning yoʻqligi, uskunalarning nosozligi, zarur maʼlumotning yetishmasligi yoki boshqa xodimlarning xatti-harakatlari.

5. Dalolatnomada komissiyaning xizmat tekshiruvini oʻtkazish uchun xodimning shaʼniga, qadr-qimmatiga yoki ishchanlik obroʻsiga putur yetkazuvchi notoʻgʻri maʼlumotlar asos boʻlganligi toʻgʻrisidagi xulosasi aniq va loʻnda shaklda bayon etilishi kerak.

Dalolatnomada notoʻgʻri maʼlumotlarni rad etish haqidagi tavsiyalar turli shakllarda boʻlishi mumkin, masalan:

ommaviy rad etish, yaʼni tashkilot rahbariyati nomidan xodimning shaʼniga putur yetkazgan notoʻgʻri maʼlumotlar ommaviy ravishda rad etilishi mumkin (masalan, buyruq chiqarish, yigʻilishda eʼlon qilish, veb-saytda xabar joylashtirish);

rasmiy uzr soʻrash, yaʼni tashkilot rahbariyati xodimdan rasmiy ravishda uzr soʻrashi mumkin;

maʼlumotlarni tarqatgan shaxslarga nisbatan chora koʻrish. Agar notoʻgʻri maʼlumotlarni tarqatgan shaxslar aniqlansa, ularga nisbatan intizomiy yoki boshqa choralar koʻrilishi mumkin;

vaziyatga qarab, xodimning obroʻsini tiklash uchun boshqa choralar ham koʻrilishi mumkin.

6. Agar tekshiruv davomida maʼmuriy yoki jinoiy huquqbuzarlik belgilari aniqlansa, materiallar tegishli davlat organlariga yuborish taklifi ham dalolatnomaga kiritiladi.

Ushbu holatda davlat organlarining nomi vakolat doirasiga qarab aniq koʻrsatilishi kerak.

7. Xizmat tekshiruvi natijalari toʻgʻrisidagi dalolatnoma tuzilgandan soʻng, uni imzolash hamda xulosa qilish maqsadida komissiya oʻz majlisini oʻtkazadi.

Komissiya majlisida xizmat tekshiruvi haqida qaror qabul qilinganidan keyin uch ish kunidan kechiktirmay komissiya toʻplagan boshqa materiallar bilan birga dalolatnoma ish beruvchiga topshirilishi kerak.

Bu mehnat intizomiga oid huquqiy jarayonlarning shaffof va oʻz vaqtida amalga oshirilishiga xizmat qiladi.

HUJJATLARDAN NAMUNALAR

Xizmat tekshiruvi natijalari toʻgʻrisidagi

dalolatnoma

1. Umumiy maʼlumotlar

Xodimning F.I.Sh.: ______________________________

Lavozimi: ______________________________________

Ishga qabul qilingan sana: _______________________

Ish staji: ______________________________________

Ilgari qoʻllangan intizomiy jazolar: _______________

2. Komissiya tarkibi

Komissiya ish beruvchining _______ sanasidagi _______ raqamli buyrugʻi asosida tuzildi.

Komissiya raisi: ____________________________________

Aʼzolar: __________________________________________

3. Xizmat tekshiruvini oʻtkazish sababi

Tekshiruv quyidagi asosda boshlangan:

4. Tekshiruv jarayoni va materiallar

Xodim tomonidan tushuntirish xati taqdim etildi/etilmadi

Olingan hujjatlar: _______________________________

Olingan koʻrsatmalar: ______________________________

Aniqlangan holatlar: _______________________________

5. Qilmish haqida maʼlumot

Intizomiy nojoʻya xatti-harakat (agar mavjud boʻlsa):

Xodimning aybi mavjud/mavjud emas

6. Moddiy zarar (agar aniqlangan boʻlsa)

Mazmuni: _________________________________________

Miqdori: _________________________________________

7. Komissiya xulosasi

(Xodim intizomiy qilmish sodir etganligi/etmaganligi toʻgʻrisida xulosa)

(Xizmat tekshiruvining yakunlari, sabablar va sharoitlar)

(Xodimga nisbatan tavsiya etilayotgan chora-tadbirlar)

(Profilaktika va mehnat intizomini kuchaytirish choralari)

8. Alohida fikr (agar mavjud boʻlsa)

__________________________________________

(komissiya aʼzosi ismi va imzosi)

9. Komissiya aʼzolarining imzosi:

Rais: _____________________

Aʼzo: _____________________

Aʼzo: _____________________

10. Dalolatnoma ish beruvchiga topshirilgan sana:

"___" __________ 20__ y.