Yakka tartibdagi mehnatga oid munosabatlar qonunchilikda va mehnat haqidagi boshqa huquqiy hujjatlarda yoki tashkilot ustavida (nizomida) nazarda tutilgan hollarda lavozimga tayinlash yoki lavozimga tasdiqlash natijasida mehnat shartnomasi asosida yuzaga keladi.
Sharhlanayotgan moddada xodimni lavozimga tayinlash yoki lavozimga tasdiqlash natijasida mehnat shartnomasi asosida yuzaga keladigan yakka tartibdagi mehnatga oid munosabatlar haqida fikr yuritilgan.
Qator yuridik shaxslar xodimlarni lavozimga tayinlash yoki lavozimga tasdiqlash orqali ishga qabul qiladilar. Xodimlarni bu tartibda ishga olish ushbu Kodeks yoki mehnat haqidagi boshqa hujjatlarda belgilangan. Shuningdek, xodimlar tashkilot, korxona, muassasalar ustavi (nizomi)da belgilanganidek lavozimga tayinlanishi mumkin. Lavozimga tayinlangan yoki tasdiqlangan xodimlar bilan munosabatlar mehnat shartnomasi asosida vujudga keladi.
Masalan, Oʻzbekiston Respublikasi Adliya vazirining 2023 yil 4 iyul kuni “Yuridik xizmat xodimini lavozimga tayinlash va ozod qilish masalalarini adliya organlari bilan kelishish hamda birinchi marta yuridik xizmat xodimi lavozimiga tayinlangan shaxslarning adliya organlarida stajirovkadan oʻtkazish tartibi toʻgʻrisidagi nizomni tasdiqlash haqida” 9-mh-son buyrugʻi qabul qilingan. Buyruq Oʻzbekiston Respublikasi Adliya vazirligi tomonidan 2023 yil 5 iyulda 3444-sonli raqam bilan roʻyxatdan oʻtkazilgan. Buyruqqa 1-ilova bilan “Yuridik xizmat xodimini lavozimga tayinlash va ozod qilish masalalarini adliya organlari bilan kelishish hamda birinchi marta yuridik xizmat xodimi lavozimiga tayinlangan shaxslarning adliya organlarida stajirovkadan oʻtkazish tartibi toʻgʻrisida”gi Nizom tasdiqlangan.
Mazkur Nizom davlat organlari va tashkilotlarining yuridik xizmatlari xodimlarini lavozimga tayinlash va lavozimdan ozod etish masalalarini majburiy tartibda tegishlicha Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari bilan kelishish hamda yuridik xizmati xodimi lavozimiga birinchi marta tayinlangan shaxslarning adliya organlarida stajirovkadan oʻtishi tartibini belgilaydi.
Xuddi shuningdek, boshqa davlat organlari ham xodimlarni lavozimga tayinlash yoki lavozimga tasdiqlash tartib (qoida)larini mustaqil belgilab olishlari va mehnat shartnomasi asosida huquqiy munosabatlarni vujudga keltirishlari mumkin.
O'zbekiston Respublikasi Kambag'allikni qisqartirish va bandlik vazirligi