Bir necha kasbda (lavozimda) ishlaganda, xizmat koʻrsatish doirasi kengayganda, ish hajmi koʻpayganda xodimning asosiy lavozimdagi ish haqiga quyidagilar uchun qoʻshimcha toʻlov belgilanadi va toʻlanadi:
byudjetdan moliyalashtirilmaydigan tashkilot xodimlari uchun — bir necha kasbda (lavozimda) haqiqatda bajarilgan ishga doir ish haqi miqdorida;
byudjet tashkilotlari xodimlari uchun — bir necha lavozimda ishlaganlik uchun tarif stavkasining (maoshining) ellik foizidan koʻp boʻlmagan miqdorda.
Vaqtincha yoʻq boʻlgan xodimning majburiyatlarini bajarish vazifasi shtatdagi uning oʻrnini bosadigan shaxs zimmasiga asosiy ishdan ozod etilmagan holda yuklatilganda qoʻshimcha toʻlov amalga oshirilmaydi.
1.1. MKning 116-moddasida bir necha kasbda (lavozimda) ishlash, xizmat koʻrsatish doirasini kengaytirish, ish hajmini koʻpaytirish, vaqtincha yoʻq boʻlgan xodimning majburiyatlarini mehnat shartnomasida belgilangan ishdan ozod etilmagan holda bajarish tartibi va shartlari belgilangan (MKning 116-moddasi sharhiga qarang).
Sharhlanayotgan moddaning birinchi qismida xodim bir vaqtning oʻzida bir necha kasbda (lavozimda) ishlasa, xizmat koʻrsatish doirasi kengaysa, ish hajmi koʻpaytirilsa, uning ish haqiga qanday qoʻshimcha toʻlovlar belgilanishi koʻrsatilgan.
Agar xodim bir necha kasbda (lavozimda) ishlasa, uning xizmat koʻrsatish doirasi kengaysa yoki ish hajmi koʻpaysa, asosiy lavozimdagi ish haqiga qoʻshimcha toʻlov belgilanadi va toʻlanadi. Bu degani xodim faqat bir lavozim uchun emas, balki bajargan qoʻshimcha ishlari uchun ham haq olishi kerak.
Qoʻshimcha haq toʻlash ikki xil turda amalga oshiriladi.
1.2. Byudjetdan moliyalashtirilmaydigan tashkilot xodimlari agar bir necha kasbda (lavozimda) ishlasa, xizmat koʻrsatish doirasi kengaysa, ish hajmi koʻpaysa qoʻshimcha toʻlov uning haqiqatda bajargan ishiga qarab belgilanadi. Yaʼni, xodim qancha qoʻshimcha ish bajargan boʻlsa, shunga mos ravishda ish haqi olishi mumkin. Bu yerda qoʻshimcha toʻlovning aniq miqdori qonunchilikda belgilanmagan boʻlib, bunda bajarilgan ishning hajmi va murakkabligiga bogʻliq boʻladi.
MISOL
Agar xodim bir vaqtning oʻzida asosiy ishidan tashqari yana bir stavkada ishlasa, u ikkala stavka uchun ham toʻliq ish haqi olishi mumkin.
1.3. Byudjet tashkilotlari xodimlarining qoʻshimcha ish uchun toʻlov miqdori cheklangan. Xodimga bir necha kasbda (lavozimda) ishlaganda, xizmat koʻrsatish doirasi kengayganda, ish hajmi koʻpayganda uchun asosiy tarif stavkasining (maoshining) ellik foizidan koʻp boʻlmagan miqdorda qoʻshimcha toʻlov belgilanadi. Yaʼni, xodimning qoʻshimcha ish haqi asosiy maoshining yarmidan oshib ketmaydi.
MISOL
Agar xodimning asosiy maoshi 5 mln soʻm boʻlsa, u qoʻshimcha lavozimlar uchun eng koʻp 2 mln 500 ming soʻm qoʻshimcha haq olishi mumkin.
2. Mehnat taʼtili, vaqtincha mehnatga layoqatsizlik davri yoki boshqa hollarda xodim ishda boʻlmasa, uning vazifasini bajarish kimga yuklatilgan boʻlsa, ushbu vazifa yuklatilgan xodimga qoʻshimcha toʻlov amalga oshirilmaydi.
Ushbu holatda vazifani yuklatish lavozim yoʻriqnomasida, mehnat shartnomasida yoki mehnat toʻgʻrisidagi boshqa hujjatlarda xodimning zimmasiga yuklatilgan boʻlishi va xodim bu bilan tanishtirilgan boʻlishi kerak.
Vazifa yuklatilgan xodim oʻzining vazifasini bajarishdan ozod etilmaydi va bir vaqtning oʻzida ushbu qoʻshimcha vazifani ham bajaradi.
O'zbekiston Respublikasi Kambag'allikni qisqartirish va bandlik vazirligi