Mehnat shartnomasi taraflarining moddiy javobgarligi mehnat shartnomasi tarafining boshqa tarafga yetkazilgan ziyonning oʻrnini ushbu Kodeksda va boshqa qonunlarda belgilangan tartibda qoplash majburiyatini ifodalaydigan yuridik javobgarlikdir.
Zarar yetkazilgandan keyin mehnat shartnomasining bekor qilinishi ushbu shartnoma tarafini moddiy javobgarlikdan ozod etmaydi.
1. Sharhlanayotgan moddaning birinchi qismida mehnat shartnomasi taraflarining moddiy javobgarligi taʼrif berilgan boʻlib, mehnat shartnomasi tarafining boshqa tarafga (ish beruvchi xodimga yoki xodim ish beruvchiga) yetkazilgan ziyonning (zararning) oʻrnini MKda va boshqa qonunlarda belgilangan tartibda qoplash majburiyatini ifodalaydigan yuridik javobgarlikdir.
Ziyonning oʻrnini qoplash majburiyatini MKda va boshqa qonunlarda belgilangan boʻlishi kerak, ichki hujjatda belgilash mumkin, lekin ushbu ichki hujjatlarda belgilangan tartib MK yoki qonunlarga asoslangan boʻlishi kerak.
Yuridik javobgarlik deganda ish beruvchi yoki xodimga yetkazilgan ziyonni oʻrnini qoplash uchun moddiy toʻlovlarni amalga oshirish majburiyat yuklatilishi tushuniladi.
2. Agar mehnat shartnomasi taraflaridan biri (xodim yoki ish beruvchi) ikkinchi tarafga moddiy zarar yetkazgan boʻlsa, hatto mehnat shartnomasi keyin bekor qilinsa ham, zarar yetkazgan shaxsning moddiy javobgarlik majburiyati saqlanib qoladi.
Agar zarar ixtiyoriy ravishda qoplanmasa, xodim ish beruvchidan zararni sud orqali talab qilishi mumkin, shuningdek ish beruvchi ham xodimdan zararni qoplash uchun sudga murojaat qila oladi, bunda mehnat shartnomasi bekor qilingan boʻlsa ham, bu huquq yoʻqolmaydi.
O'zbekiston Respublikasi Kambag'allikni qisqartirish va bandlik vazirligi