Sharhlanayotgan moddada mehnat shartnomasi taraflarining moddiy javobgarligini aniqlashtirishi mumkinligi koʻrsatilmoqda, bu tavsiyaviy norma boʻlib, mehnat shartnomasi yoki unga yozma shaklda tuziladigan qoʻshimcha kelishuv, shuningdek jamoa shartnomasida aniqlashtirishga ruxsat bermoqda.

Agar ushbu hujjatlarda mehnat shartnomasi taraflarining moddiy javobgarligini aniqlashtirilsa:

ish beruvchining xodim oldidagi shartnomaviy javobgarligi MK da nazarda tutilganidan kam boʻlmasligi kerak;

xodimning ish beruvchi oldidagi javobgarligi esa MKda nazarda tutilganidan yuqori boʻlmasligi kerak.

MISOLLAR

1. Ish beruvchining javobgarligi. Ish beruvchi xodimning shaxsiy buyumlariga zarar yetkazdi va 15 mln soʻmlik yoʻqotish keltirdi.

Mehnat shartnomasida ish beruvchining xodim oldidagi javobgarligi MKdan kam qilib belgilanishi mumkin emas.

Agar MKda "toʻliq qoplanadi" deyilgan boʻlsa, shartnoma orqali uni "yarim qoplanadi" deb oʻzgartirish mumkin emas.

2. Xodimning javobgarligi. Payvandchi ehtiyotsizlik tufayli bir uskunaga zarar yektazdi (u toʻliq moddiy javobgar emas) natijada ish beruvchiga 10 mln soʻm zarar keltirdi. MK 340-moddasiga koʻra xodim oʻzining oʻrtacha oylik ish haqi doirasida moddiy javobgar boʻladi. Payvandchining oʻrtacha ish haqi 5 mln soʻmni tashkil etadi. Ushbu holatda payvandchidan 5 mln soʻm undirilishi mumkin.

Mehnat shartnomasida bu javobgarlik oʻrtacha oylik ish haqining uchdan ikki qismi deb belgilanishi mumkin, lekin yetkazilgan zararning barchasi deb belgilay olmaydi.