1. Boquvchi vafot etganligi munosabati bilan yetkazilgan zararning oʻrnini ish beruvchi tomonidan qoplash boquvchi vafot etganligi munosabati bilan yetkazilgan zararning oʻrni ish beruvchi tomonidan qoplanishiga doir huquqqa ega boʻlgan shaxslarga toʻlanishi kerak boʻlgan toʻlovlardan biri bu qoʻshimcha xarajatlarni kompensatsiya qilish hisoblanadi.

Ushbu qoʻshimcha xarajatlarni kompensatsiya qilish xodim mehnatda mayib boʻlganligi munosabati bilan vafot etgan taqdirda ish beruvchi dafn etish uchun zarur boʻlgan xarajatlar, vafot etgan xodimning jasadini tashish, ish beruvchi bilan ziyonning oʻrnini qoplashga oid nizolarni hal qilish sarflanganda amalga oshiriladi.

Ushbu xarajatlarni kompensatsiya qilish uchun ish beruvchi xarajatlarni amalga oshirilganligini tasdiqlovchi hujjatlarni va boshqa dalillarni talab qilishi mumkin.

MILLIY QONUNCHILIK

Oʻzbekiston Respublikasining “Dafn etish va dafn ishi toʻgʻrisida”gi Qonunining 9-moddasi uchinchi qismiga koʻra korxona, muassasa, tashkilotning xodimi yoki xodimning qaramogʻida boʻlgan oila aʼzosi vafot etgan taqdirda dafn etish uchun nafaqani toʻlash mazkur xarajatlarning oʻrni keyinchalik Oʻzbekiston Respublikasi Davlat byudjeti mablagʻlari hisobidan qoplangan holda korxona, muassasa yoki tashkilot tomonidan amalga oshiriladi.

2. Dafn etish uchun zarur boʻlgan xarajatlar va ushbu moddaning uchinchi qismida nazarda tutilgan xarajatlarni ish beruvchi tomonidan kompensatsiya qilinganda MKning 331-moddasida koʻrsatilgan zararning oʻrnini qoplash uchun hisoblanadigan toʻlovlarni hisoblashda inobatga olinmaydi.

3. Boquvchi vafot etganligi munosabati bilan kompensatsiya qilinadigan qoʻshimcha xarajatlarga dafn etish uchun zarur xarajatlardan tashqari:

xodimning jasadini tashish uchun ushbu xizmatni amalga oshiruvchi yuridik shaxslarga yoki jismoniy shaxslarga toʻlangan xarajatlar;

ish beruvchining boquvchi vafot etganligi munosabati bilan yetkazilgan ziyonning oʻrnini qoplash rad etilganligi toʻgʻrisidagi qarori ustidan shikoyat qilish yoki nizo mazkur xarajatlarni qilgan shaxs foydasiga hal boʻlgan taqdirda toʻlanishi lozim boʻlgan toʻlovlarning miqdori xususida nizolashish bilan bogʻliq xarajatlar kiradi.

Ish beruvchi bilan ziyonning oʻrnini qoplashga oid nizolarni hal qilishda zararni undirish huquqiga ega boʻlgan shaxslar mutaxassislarning maslahatlari, koʻrsatilgan yuridik xizmat uchun advokatga haq toʻlash xarajatlari, mediatorga haq toʻlash, yoʻl xarajatlari va boshqalar xarajat qilgan boʻlishi mumkin. Ushbu xarajatlar ish beruvchi tomonidan kompensatsiya qilinishida tegishli tasdiqlovchi hujjatlarni talab qilinishi mumkin.