Kasanachi tomonidan mehnat faoliyatini amalga oshirish jarayonida, ish beruvchi tomonidan oldindan ruxsat berilmagan boʻlsa ham, kasanachining yaqin oila aʼzolari — yaʼni birgalikda yashaydigan va moddiy-maishiy birlikda turmush kechirayotgan shaxslar — ish jarayonida kasanachiga yordam berishi mumkin. Bu holatda, bevosita ishni bajarishda ishtirok etayotgan shaxslar (masalan, er-xotin, farzandlar, ota-ona) bilan ish beruvchi oʻrtasida mustaqil mehnat munosabatlari vujudga kelmaydi. Yaʼni, ular kasanachining oʻrniga alohida mehnat huquqiy munosabatlarining taraflari sifatida eʼtirof etilmaydi.

Ushbu tartib kasanachilikning oʻziga xos xususiyati — mehnat uy sharoitida amalga oshirilishi va kooperatsiya shaklida boʻlishi bilan izohlanadi. Buning natijasida, ishni amalga oshirishda oila aʼzolarining ishtirokini cheklash emas, balki ularning rasman mehnat munosabatlariga kiritilmasligi nazarda tutiladi. Chunki kasanachi shartnoma boʻyicha ish beruvchining mehnat munosabatlaridagi yagona hamkoridir.

Shu bilan birga, oila aʼzolarining yordamida bajarilgan ishlar uchun javobgarlik kasanachining zimmasiga yuklatiladi. Bu javobgarlik, avvalo, ish natijasining (mahsulot yoki xizmatning) sifati, meʼyori, muddati hamda texnik talablarga muvofiqligi nuqtai nazaridan yuzaga keladi. Yaʼni, agar kasanachiga yordam bergan oila aʼzolari tomonidan amalga oshirilgan ishda nuqson yoki kamchiliklar boʻlsa, ish beruvchi bu haqida bevosita kasanachining oʻziga murojaat qiladi va faqat uning oʻzidan yetkazilgan zararni qoplashni talab eta oladi.