462-modda · VI bo'lim · Ayrim toifadagi xodimlar mehnatini huquqiy jihatdan tartibga solishning oʻziga xos xususiyatlari
Agar masofadan turib ishlovchi xodim mehnat toʻgʻrisidagi qonunchilikka, mehnat haqidagi boshqa huquqiy hujjatlarga yoki mehnat shartnomasiga muvofiq davomiyligi uzoqroq boʻlgan har yilgi mehnat taʼtiliga chiqish huquqiga ega boʻlmasa, uning har yilgi mehnat taʼtilining davomiyligi yigirma bir kalendar kundan kam boʻlishi mumkin emas.
Masofadan turib ishlovchi xodimga har yilgi mehnat taʼtilini va boshqa turdagi taʼtillarni berish tartibi masofadan turib ishlash haqidagi mehnat shartnomasida ushbu Kodeksga hamda mehnat toʻgʻrisidagi boshqa huquqiy hujjatlarga muvofiq belgilanadi.
1. Qoidaning mohiyati shundaki, masofadan turib ishlovchi har bir xodimga har yili 21 kalendar kundan kam boʻlmagan asosiy mehnat taʼtili berilishi shart.
Yaʼni, ish beruvchi xodimga ish yilida toʻliq ishlaganda 21 kundan kam taʼtil berishga haqli emas.
Uning davomiyligi mehnat shartnomasi, jamoa shartnomasi yoki ichki hujjatlar bilan 21 kundan uzoqroq qilib belgilanishi mumkin, lekin qisqaroq qilib belgilash mumkin emas.
Moddadagi “Agar masofadan turib ishlovchi xodim mehnat toʻgʻrisidagi qonunchilikka, mehnat haqidagi boshqa huquqiy hujjatlarga yoki mehnat shartnomasiga muvofiq davomiyligi uzoqroq boʻlgan har yilgi mehnat taʼtiliga chiqish huquqiga ega boʻlmasa” degan jumla istisnoni anglatadi.
Qonunchilikka koʻra agar xodimning ishi (masalan, ogʻir va zararli mehnat sharoitlari, oʻqituvchilar, ilmiy xodimlar) qonunchilik bilan belgilangan qoʻshimcha yoki uzaytirilgan taʼtillar roʻyxatiga boʻlsa, bunday hollarda, mehnat taʼtilining umumiy davomiyligi 21 kundan koʻp boʻladi (masalan, 27 yoki 30 kalendar kun).
Mehnat shartnomasiga yoki jamoa shartnomasida xodim uchun 21 kundan uzoqroq (masalan, 24 kalendar kun) mehnat taʼtili belgilangan boʻlsa, unday holda ham shartnomada belgilangan muddatga mehnat taʼtili beriladi.
Bu qoidaning masofaviy ishga aloqadorligi uning mehnat qonunchiligidagi asosiy normalarning saqlanib qolishini taʼminlashdadir. Masofadan turib ishlovchi xodim, tashkilotda ishlovchi xodimlar bilan teng ravishda, yetarli dam olish huquqiga ega boʻlishi kerak. Ish beruvchi xodimning uyda yoki boshqa joyda ishlayotganligini asos qilib, uning asosiy mehnat taʼtil muddatini qisqartirishga haqli emas.
2. Masofadan turib ishlovchi xodimga har yilgi mehnat taʼtilini va boshqa turdagi taʼtillarni berish tartibi umumiy normalarga asosan belgilanadi.
Shuningdek, masofadan turib ishlovchi xodimga har yilgi mehnat taʼtilini va boshqa turdagi taʼtillarni berish tartibini mehnat shartnomasida belgilanadi, lekin ushbu tartib MKga va mehnat toʻgʻrisidagi boshqa huquqiy hujjatlarga muvofiq boʻlishi kerak.
Yaʼni, xodimning ahvolini ogʻirlashtiruvchilar holatlarni kiritish mumkin emas.
O'zbekiston Respublikasi Kambag'allikni qisqartirish va bandlik vazirligi