1. Oʻrindosh-xodimlar korxonaning boshqa asosiy xodimlari bilan bir qatorda yillik asosiy haq toʻlanadigan mehnat taʼtilini olish huquqiga ega.

Barcha xodimlar, shu jumladan oʻrindoshlik asosida ishlaydigan xodimlar har yilgi mehnat taʼtiliga chiqish huquqiga ega. (MKning 216-moddasi). Taʼtil kunlarini hamda toʻlovlarini berish tartibi ichki yoki tashqi oʻrindoshlikka bogʻliq emas. Ammo oʻrindoshlarga taʼtil berish uchun ish beruvchi bir qator talablarni hisobga olishi kerak.

Oʻrindosh-xodimlar mehnat qonunchiligida va tashkilotning ichki hujjatlarida nazarda tutilgan barcha turdagi taʼtillarni olish huquqiga ega. Oʻrindosh-xodimlar quyidagi taʼtillarni olish huquqiga ega:

yillik haq toʻlanadigan mehnat taʼtili (asosiy va qoʻshimcha);

ijtimoiy (homiladorlik va tugʻish, bola parvarishi, taʼlim va ijodiy taʼtillari);

qisman ish haqi saqlangan taʼtil;

ish haqi saqlanmagan taʼtil.

Taʼtil jadvalida oʻrindoshlarning taʼtil vaqtini koʻrsatishga ruxsat beriladi, lekin uning asosiy ish joyidagi taʼtil sanasi va davomiyligi maʼlum boʻlgan taqdirdagina. Boshqa hollarda, taʼtil sanasini koʻrsatmaslik tavsiya etiladi. Taʼtillar jadvali taʼtillar ketma-ketligini belgilash uchun moʻljallanganligi sababli oʻrindoshlarning taʼtili rejalashtirilganidek boʻlmasligi va asosiy ish joyidagi taʼtil jadvaliga asoslanishi mumkin.

2. Oʻrindoshlar uchun navbatdagi yillik mehnat taʼtili asosiy ish joyidagi yillik mehnat taʼtili bilan bir vaqtda beriladi. Bunday holda, ish beruvchi oʻrindoshning asosiy ish joyidan taʼtil olishini taʼminlash uchun quyidagi tasdiqlovchi hujjatlardan birini talab qilishga haqlidir:

taʼtilning sanasi va davomiyligi koʻrsatilgan maʼlumotnoma;

taʼtil berish toʻgʻrisidagi buyruqning nusxasi;

taʼtillar grafigidan koʻchirma.

Oʻrindosh-xodim, agar u ishga qabul qilingan kundan boshlab olti oydan kam ishlagan boʻlsa ham, birinchi ish yili uchun taʼtil olishi mumkin. Shu bilan birga, taʼtil toʻlovi oʻrindoshlarga ishlab berilgan vaqtiga mutanosib ravishda haq toʻlangan holda toʻliq davomiylikda beriladi. (MKning 223-moddasi)

3. MKning 227-moddasiga koʻra oʻrindoshlik asosida ishlaydigan xodimlar uchun taʼtil toʻlovi ishlagan vaqtiga mutanosib ravishda hisoblanadi. Bunday holda, foydalanilmagan taʼtil uchun kompensatsiya toʻlash uchun oʻrtacha oylik ish haqi va oʻrindosh uchun ishdan boʻshatish nafaqasini hisoblash toʻliq stavkada ishlaydigan xodimlar uchun taʼtillarni toʻlash uchun hisob-kitob bilan bir xil tarzda amalga oshirilishi kerak.

4. Baʼzida oʻrindosh-xodimning asosiy ish joyidagi yillik asosiy taʼtilining davomiyligi ikkinchi ish joyidagi taʼtil davomiyligidan kam boʻlishi yoki aksincha boʻlishi mumkin. Bunday xollarda, oʻrindosh-xodimning qaysi ish joyidagi taʼtili davomiyligi tugashidan qatʼi nazar xodim asosiy yoki oʻrindoshlik asosidagi ishiga chiqishi hamda ikkinchi ish joyida taʼtilda boʻlishi mumkin.

Agar, oʻrindoshning asosiy ish joyi boʻyicha yillik mehnat taʼtilining davomiyligi oʻrindoshlik asosidagi ishdagi mehnat taʼtilining davomiyligidan koʻp boʻlgan hollarda, ish beruvchi oʻrindoshning iltimosiga koʻra unga oʻrindoshlik asosidagi ishdagi yillik mehnat taʼtilidan tashqari asosiy ishidagi yillik mehnat taʼtili va oʻrindoshlik asosidagi ishning yillik mehnat taʼtili davomiyligi oʻrtasidagi farqni tashkil etuvchi kunlarga ish haqi saqlanmaydigan taʼtil ham berishi shart.