451-modda · VI bo'lim · Ayrim toifadagi xodimlar mehnatini huquqiy jihatdan tartibga solishning oʻziga xos xususiyatlari
Kasanachi bilan tuzilgan mehnat shartnomasi ushbu Kodeksda nazarda tutilgan asoslarda va tartibda, shuningdek mehnat shartnomasida nazarda tutilgan asoslarga koʻra bekor qilinishi mumkin.
MKning 155-moddasining ikkinchi qismi mehnat shartnomasini bekor qilish asoslarini nazarda tutadi. Ish beruvchi kasanachini ushbu asoslardan birortasi boʻlgani holda ishdan boʻshatishga haqli.
Mehnat shartnomasini bekor qilish asoslari va tartibi kasanachi xodimlarga nisbatan ham qoʻllaniladi. Ushbu xodimlar mehnat shartnomasining bekor qilinishi bilan bogʻliq boʻlgan kafolatlarga ham ega boʻladilar.
Bundan tashqari, sharhlanayotgan modda kasanachilar bilan tuzilgan mehnat shartnomasida mazkur shartnomani bekor qilish asoslarini nazarda tutish mumkin ekanligini belgilaydi. Bu qoida MKning 155-moddasining 2-qismi 11-bandiga muvofiqdir.
Bu asoslarga quyidagilarni misol qilish mumkin:
ish beruvchi faoliyati vaqtincha toʻxtatilganligi;
ish beruvchi asbob uskuna yoki xom-ashyo bilan taʼminlay olmaganda;
kasanacha tomonidan ishlab chiqarilayotgan mahsulotni sotish imkoni boʻlmaganda;
va boshqa asoslar.
Kasanachining mehnat shartnomasini bekor qilish MK 170-moddasiga muvofiq rasmiylashtiriladi. Kasanachi mehnat shartnomasida nazarda tutilgan asosga koʻra ishdan boʻshatilganda buyruqda MK 451-moddasi hamda mehnat shartnomasini bekor qilishni nazarda tutuvchi mehnat shartnomasining bandi aniq koʻrsatilishi talab etiladi.
O'zbekiston Respublikasi Kambag'allikni qisqartirish va bandlik vazirligi