1. Masofadan turib ishlashga oʻtishda yoki bunday ish shartnomasini tuzishda yuzaga keladigan barcha muhim tashkiliy va moliyaviy masalalar qonun tomonidan qatʼiy belgilanmaydi, balki ish beruvchi va xodimlarning oʻzaro kelishuvi asosida tartibga solinadi.

Masofadan ishlash uchun xodimga maxsus uskunalar (masalan, kompyuter, noutbuk), dasturiy-texnik vositalar (zarur dasturiy taʼminot, litsenziyalar), axborotni himoya qilish vositalari (antiviruslar, VPN) kerak boʻladi.

Ish beruvchi xodimni ushbu vositalar bilan qay tartibda va qaysi muddatlarda taʼminlashi kerakligi, masalan, ularni sotib olib berish yoki xodimga tegishli boʻlgan vositalardan foydalanishga ruxsat berish tartibi aniqlashtirilishi shart.

Ish beruvchi masofadan ishlovchi xodimning ish hajmini va sifatini nazorat qilish imkoniyatiga ega boʻlishi kerak.

Xodim bajargan ishlar haqida qanday shaklda (elektron pochta orqali, maxsus tizimda), qanchalik tez-tez (kundalik, haftalik, oylik) va qaysi muddatlarda hisobot topshirishi kerakligi belgilanadi.

Agar xodim ish beruvchining uskunalaridan emas, balki oʻziga tegishli boʻlgan yoki ijaraga olingan shaxsiy uskunalar (kompyuter, telefon, internet) va aloqa vositalaridan foydalansa, ish beruvchi bu xarajatlarni qoplab berishi shart. Uning miqdori (masalan, har oyda belgilangan soʻmdagi aniq miqdorda yoki foizda), uni toʻlash tartibi (ish haqi bilan birga yoki alohida) va muddatlari (masalan, har oyning 5-sanasi) kelishilishi kerak.

Masofadan ishlash bilan bogʻliq boshqa xarajatlar, masalan, elektr energiyasi isteʼmolining ortishi, qoʻshimcha aloqa xizmatlari yoki uyda ish joyini jihozlashga ketgan xarajatlar ham qoplanishi mumkin.

Ushbu xarajatlarni aniqlash (tasdiqlovchi hujjatlar asosida yoki shartli ravishda) va qoplash tartibi ham kelishuv asosida belgilanadi.

Yuqoridagi barcha masalalar quyidagi hujjatlardan birida yoki bir nechtasida rasmiylashtirilishi kerak:

Jamoa shartnomasida tashkilotdagi barcha xodimlar uchun umumiy qoidalar belgilanadi.

Ichki hujjatlar: buyruqlar, nizomlar yoki masofadan ishlash qoidalarida tasdiqlanadi. Bu hujjatlarda hisobot topshirish shakllari, muddatlari va aloqa vositalaridan foydalanish qoidalari koʻrsatilishi mumkin.

Mehnat shartnomasida aniq xodimga tegishli shartlar (masalan, kompensatsiya miqdori) yozib qoʻyiladi.

2. Xizmat safari qoidalari MK va boshqa qonunchilik hujjatlari bilan belgilangan boʻlib, masofadan turib ishlovchi xodim ish beruvchining buyrugʻiga muvofiq ish beruvchi joylashgan yerga borishi koʻrsatilsa, xodim ish beruvchi joylashgan yerga borib, oʻsha kuniyoq uyiga qaytib kelish imkoniyatiga ega boʻlsa (masalan, yaqin masofada yashasa), bu xizmat safari hisoblanmaydi, balki ish vaqti hisoblanadi. Agar boradigan manzil uzoq boʻlsa va xodim tunab qolishga majbur boʻlsa, bu xizmat safari sifatida rasmiylashtiriladi.

Masofadan turib ishlovchi xodim odatda uydan yoki boshqa joydan turib ishlaydi. Uning ish joyi, yaʼni ofisga yoki korxona joylashgan manzilga borishi aynan masofaviy ish tartibidan farqli hisoblanadi.

Bu qoidani toʻgʻri qoʻllash uchun xodim va ish beruvchi oʻrtasidagi kelishuv mehnat shartnomasida yoki alohida kelishuvda aniq koʻrsatilishi, hamda har bir xizmat safari buyruq asosida rasmiylashtirilishi shart. Buyruqda safarning maqsadi, vaqti va joyi aniq koʻrsatilgan boʻlishi lozim.

MISOL

Masofadan turib ishlovchi xodim Toshkentda yashaydi. U ish beruvchining buyrugʻiga asosan Samarqanddagi ofisiga borishi kerak. Agar xodim Samarqandda bir necha kun qolishi kerak boʻlsa va har kuni Toshkentga qaytish imkoniyatiga ega boʻlmasa, bu safar xizmat safari hisoblanadi.

Masofadan turib ishlovchi xodim Andijonda yashaydi. U ish beruvchining buyrugʻiga asosan Andijon shahridagi boshqa ofisiga borishi kerak. Agar xodim ish kuni tugagandan soʻng uyiga qaytish imkoniyatiga ega boʻlsa, bu safar xizmat safari hisoblanmaydi.