1. MKning 217-moddasiga muvofiq, har yilgi asosiy eng kam mehnat taʼtilining davomiyligi yigirma bir kalendar kunni tashkil etadi. Ish beruvchi kasanachiga ham boshqa xodimlar singari ushbu muddatdan kam boʻlmagan miqdorda taʼtil berishi va unga haq toʻlashda MKning 233-moddasi qoidalarini inobatga olishi lozim.

Sharhlanayotgan moddaning birinchi qismi ish beruvchining kasanachiga yigirma bir kalendar kundan ortiq taʼtil berishni taqiqlamaydi, aksincha, tashkilotning jamoa shartnomasida yoki boshqa ichki hujjatlarda kasanachilar uchun taʼtil muddatini oshirish huquqini belgilaydi.

Bundan tashqari, kasanachilikni tartibga soluvchi normativ-huquqiy hujjatlarda va ijtimoiy sheriklikning yuqori darajalarida qabul qilingan mehnat haqidagi huquqiy hujjatlarda ham mehnat taʼtili yigirma bir kalendar kundan koʻproq etib belgilanishi mumkin. Bunday holda ish beruvchi kasanachiga ushbu hujjatlarda belgilangan miqdordan kam boʻlmagan taʼtil berishi shart.

2. Sharhlanayotgan moddaning ikkinchi qismiga muvofiq, kasanachining taʼtilga chiqish huquqini taʼminlash maqsadida ish beruvchi u bilan kelishgan holda taʼtillar jadvalida uning taʼtilga chiqish vaqtini aniq koʻrsatishi kerak. Demak, ish beruvchi kasanachini oʻzi xohlagan vaqtda har yilgi mehnat taʼtiliga chiqarib yubora olmaydi.

Tasdiqlangan taʼtillar jadvalini tasdiqlash ish beruvchini majburiyati, unga rioya etish ish beruvchi va kasanachi uchun majburiy boʻladi.