1. Sharhlanayotgan moddaning birinchi qismida Oʻzbekiston Respublikasida ishlanmaydigan bayram kunlar roʻyxati keltirilgan boʻlib, ushbu bayramlarda umumiy qoidaga koʻra ishga jalb etish mumkin emas (MK 210-moddada koʻrsatilgan hollardan tashqari).

Ushbu bayramlardan Roʻza hayit (Iyd al-Fitr) diniy bayramining birinchi kuni va Qurbon hayit (Iyd al-Adha) diniy bayramining birinchi kunining aniq sanasi MKda koʻrsatilmagan boʻlib, bu Oʻzbekiston Respublikasi Prezidentining Farmoni yoki qarori bilan bayramdan oldin belgilanadi.

2. Dam olish kunlari va bayram kunlarini birlashtirib boʻlmaydi. Yaʼni, bayram kuni dam olish kuniga toʻgʻri keladigan boʻlsa, uni albatta boshqa ish kuniga koʻchirilishi nazarda tutilgan. Masalan, sharhlanayotgan moddada belgilangan bayram kuni shanba kuniga toʻgʻri keladigan boʻlsa, unda dam olish kuni boshqa ish kuniga koʻchirilishi nazarda tutilgan. Bunda besh kunlik ish haftasida ishlaydigan xodimlar uchun bayram kuni va ishlamaydigan dam olish kunlarining umumiy hisobda 3 kun dam olishadilar, olti kunlik ish haftasida esa 2 kun dam oladilar, chunki shanba kuni olti kunlik ish haftasida ish kuni hisoblanadi.

Demak, ularni dam olish kuni yakshanba yoki boshqa kun hisoblangan holda koʻchirilmaydi. Uzluksiz ish vaqti rejimida ishlayotganlar uchun dam olish kunlari (smenalar almashish grafigi asosida) hafta davomida belgilanishini eʼtiborga olgan holda ular uchun bayram kunlari koʻchirilmaydi va bayram kuni ishlagani uchun kamida ikki hissa pul toʻlanadi.

Bayram (ishlanmaydigan) kunlari faqat ishlab chiqarish-texnika xususiyatlariga koʻra toʻxtatib boʻlmaydigan ishlarda, aholiga turli xizmat koʻrsatish (kommunal, transport, aloqa, savdo-sotiq, tibbiyot tashkilotlari va boshqalar) bilan bogʻliq boʻlgan ishlarda va oʻzining xususiyatiga koʻra uzluksiz davom etadigan (masalan, tashkilot qoʻriqchilik xizmati) ishlarda ishga jalb etish nazarda tutilgan. Bunday holatda bayram kuni uchun dam olish kuni koʻchirilmaydi va bu kunda ishlaganlik uchun xodimlarga kamida ikki hissa barobar pul toʻlanishi MKning 263-moddada belgilangan tartibda amalga oshiriladi.

3. Dam olish kuni ishlanmaydigan bayram kuniga toʻgʻri kelgan taqdirda, dam olish kuni bayramdan keyingi ish kuniga koʻchirilishi Prezident Farmoni bilan amalga oshirish amaliyoti mavjud. Bunda Prezident Farmoni mazmunida alohida tartibda besh kunlik va olti kunlik ish haftasi rejimi uchun belgilangan dam olish kunlari belgilanishi mumkin.

XALQARO STANDARTLAR

Iqtisodiy, ijtimoiy va madaniy huquqlar toʻgʻrisidagi xalqaro Paktning 7-moddasiga muvofiq, Paktda ishtirok yetuvchi davlatlar har bir shaxsning adolatli va qulay mehnat sharoitlariga ega boʻlish huquqini tan oladilar, xususan: dam olish, hordiq chiqarish va ish vaqtining oqilona cheklanishi hamda haq toʻlanadigan muntazam taʼtil, shuningdek bayram kunlari uchun mukofot.