Har yilgi mehnat taʼtilida boʻlgan vaqti uchun xodimga ushbu Kodeksning 257-moddasiga muvofiq hisoblab chiqariladigan oʻrtacha ish haqining saqlanishi kafolatlanadi.
Har yilgi mehnat taʼtili vaqti uchun haq toʻlashda yakshanba kuni inobatga olinmaydi.
Har yilgi mehnat taʼtili vaqti uchun haq toʻlash jamoa shartnomasida, ichki hujjatlarda yoxud mehnat shartnomasida belgilangan muddatlarda, biroq taʼtil boshlanguniga qadar oxirgi ish kunidan kechiktirmay amalga oshiriladi.
1. Ushbu moddaning birinchi qismida xodim har yilgi mehnat taʼtilida boʻlgan vaqt uchun oʻrtacha ish haqi saqlanishi kafolatlangan.
Oʻrtacha ish haqini hisoblash MK 257-moddasi koʻrsatilgan.
2. Har yilgi mehnat taʼtili vaqti uchun haq toʻlashda yakshanba va ishlanmaydigan bayram kunlari inobatga olinmaydi.
3. Ushbu moddaning uchinchi qismiga binoan, ushbu kafolatlangan oʻrtacha ish haqi jamoa shartnomasida, ichki hujjatlarda yoxud mehnat shartnomasida belgilangan muddatlarda, biroq taʼtil boshlanguniga qadar oxirgi ish kunidan kechiktirmay toʻlanishi kerakligi kafolatlangan.
“Oxirgi ish kuni” nafaqat odatiy hollardagi kalendar boʻyicha oxirgi ish kunini, balki alohida ish rejimida ishlaydigan xodimlarning, masalan smenali ishda ishlaydiganlarning, vaxta usulida ishlaydiganlarning, oʻrindoshlik asosida ishlaydiganlarning va shu kabi boshqa hollarda yuzaga keladigan “oxirgi ish kuni”ni ham inobatga olish kerak.
Aytaylik, smenali ishda ishlaydigan xodimning mehnat taʼtili kelasi haftaning dushanba kunidan boshlansa, lekin uning oxirgi ish kuni oʻtib borayotgan haftaning payshanba kuniga toʻgʻri kelsa, mehnat taʼtili vaqti uchun toʻlanadigan oʻrtacha ish haqi oʻtib borayotgan haftaning payshanba kunidan kechikmay toʻlab berilishi kerak. Boshqacha ish rejimida ishlaydigan xodimlarga ham taʼtil vaqti uchun toʻlab berilishi kerak boʻlgan oʻrtacha ish haqi shu yoʻsinda toʻlanishi kerak.
Har yilgi mehnat taʼtili uchun oʻrtacha ish haqini oʻz vaqtida toʻlanmasligi qanday yuridik oqibatlarga olib kelishi mumkin?
Birinchidan, MKning 229-moddasiga asosan, xodimning arizasiga koʻra ish beruvchi mehnat taʼtilini boshqa muddatga koʻchirishga majbur boʻladi. Bu oʻz navbatida ishlab chiqarishda muayyan muammolarni keltirib chiqarishi, qolaversa ish beruvchining rejalariga putur yetkazishi mumkin.
Ikkinchidan, ish beruvchi oʻrtacha ish haqini toʻlashni kechiktirgan har bir kun uchun xodimga Oʻzbekiston Respublikasi Markaziy bankining oʻsha vaqtda amalda boʻlgan qayta moliyalashtirish stavkasidan kelib chiqqan holda foizlar (pulli kompensatsiya) toʻlash majburiyatini keltirib chiqaradi (MK 333-modda sharhiga qarang).
O'zbekiston Respublikasi Kambag'allikni qisqartirish va bandlik vazirligi