Ushbu Kodeksda ish beruvchi bilan tuzilgan mehnat shartnomasi asosida mehnat faoliyatini amalga oshirayotgan xodimlar uchun taʼtillarning quyidagi turlari nazarda tutilgan:
har yilgi mehnat taʼtili;
ijtimoiy taʼtillar;
ish haqi qisman saqlanadigan taʼtil;
ish haqi saqlanmaydigan taʼtil.
MKning ushbu moddasida taʼtillarning toʻrtta turi keltirilgan.
Ulardan birinchisi - har yilgi mehnat taʼtilining oʻzi ikki turda boʻladi. Birinchisi, har yilgi asosiy mehnat taʼtili (har yilgi asosiy eng kam (MKning 217-moddasi), ikkinchisi har yilgi asosiy uzaytirilgan (MKning 218-moddasi) taʼtil.
Ikkinchisi - ijtimoiy taʼtillar berilishi majburiy boʻlgan ijtimoiy taʼtillar (masalan, homiladorlik va tugʻish taʼtili) yoki ixtiyoriy foydalaniladigan ijtimoiy taʼtillar (masalan, bola ikki va uch yoshga toʻlgunga qadar bola parvarishlash taʼtili, ijodiy taʼtillar va oʻquv taʼtillari) boʻladi.
Ijtimoiy taʼtillarning turlari MK 237-moddasida koʻrsatilgan.
Uchinchisi - ish haqi qisman saqlanadigan taʼtil. Bunday taʼtillar borasidagi barcha masalalar jamoa kelishuvlarida yoki jamoa shartnomalarida yohud mehnat haqidagi boshqa huquqiy hujjatlarda (MKning 12-moddasi), ular mavjud boʻlmaganda esa mehnat shartnomasida tartibga solinishi mumkin. Ammo bunday taʼtil davrida saqlanib qolinadigan ish haqining miqdori qonunchilikda belgilangan mehnatga haq toʻlashning eng kam miqdoridan kam boʻlishi mumkin emas (MKning 240-moddasi).
Toʻrtinchisi - ish haqi saqlanmaydigan taʼtillarni ham ikki turga boʻlish mumkin.
Birinchisi, xodimning xohishiga koʻra berilishi majburiy boʻlgan ish haqi saqlanmagan taʼtil, ikkinchisi, xodim va ish beruvchi oʻrtasidagi kelishuvga koʻra beriladigan ish haqi saqlanmagan taʼtil.
Undan tashqari, qoʻshimcha taʼtillar ham bor. Ular asosiy taʼtilga qoʻshiladigan taʼtillardir. Masalan, mehnat sharoitlari noqulay ishlarda band boʻlgan xodimlarga beriladigan qoʻshimcha taʼtil (MKning 481-moddasi), noqulay tabiiy-iqlim sharoitlarida ish bajarayotgan xodimlarga beriladigan taʼtillar (MK 483-moddasi).
Shuningdek, jamoa kelishuvlarida, jamoa shartnomalarida yoki bevosita mehnat shartnomasida ish beruvchining imkoniyatidan kelib chiqqan holda va albatta uning roziligi bilan qonunchilikda belgilangandan tashqari yana boshqa qoʻshimcha taʼtillar belgilanishi mumkin.
Masalan, amaliyotda koʻpgina tashkilotlarning jamoa shartnomalarida xodimlarning toifalariga, yaʼni funktsional vazifalarining masʼuliyatiga qarab turli davomiyliklarda qoʻshimcha taʼtil kunlari belgilangan.
O'zbekiston Respublikasi Kambag'allikni qisqartirish va bandlik vazirligi