MKning 236 – 239- moddalari ijtimoiy taʼtillarga bagʻishlangan boʻlib, ushbu moddalar aynan ijtimoiy taʼtillar tushunchasini, turlarini, ijtimoiy taʼtillarni berish va ulardan foydalanishni tartibga soladi.

Sharhlanayotgan moddaga asosan, uchta maqsad uchun, birinchisi – onalikka koʻmaklashish, ikkinchisi – bolani parvarishlashga (oilaviy majburiyatlarni bajarishga) koʻmaklashish va uchinchisi taʼlim olishga koʻmaklashish uchun ijtimoiy taʼtillar berilishi nazarda tutilgan.

"Ijtimoiy" soʻzi jamiyatga, jamoadagi munosabatlarga yoki jamiyatning bir qismiga tegishli boʻlgan narsalarni bildiradi.

Shundan kelib chiqib aytadigan boʻlsak, onalik ham, bolani parvarishlash ham taʼlim olish ham bevosita ish beruvchiga emas, koʻproq jamiyat uchun kerak boʻlgani uchun ushbu taʼtillar joriy etilgan boʻlib berilishi shart qilib belgilab qoʻyilgan.

Ushbu moddada yuqorida sanab oʻtilgan maqsadlardan tashqari “boshqa ijtimoiy maqsadlarda” ham taʼtil berilishi nazarda tutilgan. “Boshqa ijtimoiy maqsadlar" jumlasiga MKning 387-moddasida nazarda tutilgan taʼtilni kiritish mumkin.

Undan tashqari, jamoa shartnomalarida ham boshqa maqsadlar uchun ijtimoiy taʼtillar berilishi nazarda tutilishi mumkin va bunday amaliyot bugungi kunda koʻpgina jamoa shartnomalarida oʻz aksini topgan. Masalan, farzandi birinchi sinfga borganda, nikoh toʻyi oʻtkazish, yangi uyga koʻchib oʻtish, dafn marosimini oʻtkazish munosabati bilan ish haqi saqlangan holda taʼtillar berish koʻpgina jamoa shartnomalariga kiritilgan.

Ijtimoiy taʼtildan foydalanish xodimning mutlaq huquqi boʻlib, u oʻz ixtiyoricha bunday taʼtildan foydalanishi mumkin. Xodimni bunday ijtimoiy taʼtil olishga majburlash mumkin emas, homiladorlik va tugʻish taʼtili va oʻn ikki yoshga toʻlmagan ikki va undan ortiq bola yoki oʻn olti yoshga toʻlmagan nogironligi boʻlgan bolasi uchun davomiyligi toʻrt kalendar kunidan iborat beriladigan ijtimoiy taʼtillar bundan mustasno.