Sharhlanayotgan modda oʻn sakkiz yoshga toʻlmagan shaxslarni ishga joylashishga boʻlgan imtiyozli huquqlarini tartibga soladi. Oʻzbekiston Respublikasining “Aholi bandligi toʻgʻrisida”gi Qonuni 38-moddasida eng kam ish oʻrinlari hisobidan zaxiralanadigan ish oʻrinlari uchun aholining ehtiyojmand toifalari koʻrsatilgan boʻlib, ushbu toifalardagilar oʻn sakkiz yoshgacha boʻlgan shaxslar boʻlsa, ular mahalliy mehnat organlarining yoʻllanmasi bilan ishga joylashish kafolatlanadi.

Shuningdek, Oʻzbekiston Respublikasining Maʼmuriy javobgarlik toʻgʻrisidagi kodeksi 50-moddasining 2-qismiga asosan, mahalliy mehnat organlari tomonidan ish oʻrinlarining belgilangan eng kam soni hisobidan ish oʻrinlariga ishga joylashtirishni asossiz ravishda rad etish — mansabdor shaxslarga bazaviy hisoblash miqdorining oʻn baravaridan yigirma baravarigacha miqdorda jarima solishga sabab boʻladi.

Oʻn sakkiz yoshgacha boʻlgan shaxslarga eng kam ish oʻrinlari hisobidan zaxiradagi ish oʻrinlariga mahalliy mehnat organlarining yoʻllanma berish tartibi “Aholi bandligi toʻgʻrisida”gi Oʻzbekiston Respublikasi Qonuni bilan tartibga solingan boʻlib, ushbu yoʻllanma elektron shaklda beriladi.

XALQARO STANDARTLAR

Oʻzbekiston Respublikasi tomonidan 2008 yil 4 apreldagi Qonun bilan Xalqaro mehnat tashkilotining Ishga qabul qilish uchun eng kichik yosh toʻgʻrisidagi, 138-sonli (Jeneva, 1973 yil 26 iyun) shuningdek 2008 yil 8 aprelda Bolalar mehnatining ogʻir shakllarini taqiqlash va tugatish boʻyicha shoshilinch choralar toʻgʻrisidagi 182-sonli Konventsiyalarining (Jeneva, 1999 yil 17 iyun) ratifikatsiya qilinishi bu sohadagi qonunchilikning xalqaro standartlarga mosligini taʼminlaydi.