I va II guruh nogironligi boʻlgan xodimlar uchun ish vaqtining davomiyligi haftasiga 36 soatdan oshmaydigan qilib belgilanadi.

I va II guruh nogironligi boʻlgan xodimlar uchun kunlik ishning (smenaning) davomiyligi tibbiy-ijtimoiy ekspert komissiyasining tavsiyalariga muvofiq belgilanadi, lekin olti kunlik ish haftasida — olti soatdan, besh kunlik ish haftasida — yetti soatu oʻttiz daqiqadan ortib ketmasligi kerak (MKning 427-moddasi sharhiga qarang).

Sharhlanayotgan moddaga muvofiq, I va II guruh nogironligi boʻlgan xodimlarning mehnatiga ish vaqtining qisqartirilgan davomiyligida haq toʻlash tegishli kasb va lavozimlardagi xodimlarga toʻliq ish vaqti davomiyligidagi miqdorda amalga oshiriladi. Bunda ish beruvchi xodimning boshqalardan kamroq ishlayotgani uchun ish haqini ham kamaytirishi mumkin emas.

Agar I va II guruh nogironligi boʻlgan xodim 18 yoshga toʻlmagan boʻlsa oʻqishidan taʼtilga chiqqan vaqtida ishlayotgan boʻlsa, ish vaqtining muddati:

16 dan 18 yoshgacha boʻlganlarga – haftasiga 36 soatdan ;

15 dan 16 yoshgacha boʻlganlarga – haftasiga 24 soatdan oshmaydigan qilib belgilanadi (MKning 415-moddasi sharhiga qarang).

Taʼtil vaqtida 18 sakkiz yoshga toʻlmagan xodimlarning kundalik ish vaqti qisqartirilgan hollardagi mehnatiga haq kundalik ish vaqti toʻliq boʻlgan chogʻda tegishli toifadagi xodimlarga beriladigan miqdorda toʻlanadi (MKning 420-moddasi qarang).

Oʻqishdan soʻng ishlayotgan oʻquvchilarning oʻquv yili davomidagi ish vaqti muddati esa:

16 dan 18 yoshgacha boʻlganlarga – haftasiga 18 soatdan ;

15 dan 16 yoshgacha boʻlganlarga – haftasiga 12 soatdan oshmaydigan qilib belgilanadi.

Korxonalarda oʻqishdan boʻsh vaqtida ishlayotgan oʻquvchilarning mehnatiga ishlagan vaqtiga mutanosib ravishda yoki ishlab chiqargan mahsulotiga qarab haq toʻlanadi.