Sharhlanayotgan moddada ish beruvchi tomonidan xodimni ishga qabul qilish bosqichlari belgilab berilgan.

Ishga qabul qilish chogʻidagi tanishtirish tartib-taomilida ishga kirayotgan shaxsni oldindan tegishli hujjatlar bilan tanishtirish majburiyati nazarda tutilgan. Bu tartib, avvalambor, axborotga boʻlgan huquq. Tanishtirish jarayoni mehnat shartnomasi imzolanishidan oldin amalga oshirilishi shart va bu normaning qoʻllanilishi xodimning kelgusida oʻz majburiyatlari va huquqlari toʻgʻrisida batafsil xabardor etilishini kafolatlaydi (MKning 123-moddasi sharhiga qarang).

Ishga qabul qilishning keyingi bosqichi mehnat shartnomasi shartlari boʻyicha taraflarning kelishuvga erishishini hamda shartnomani xodim va ish beruvchi tomonidan imzolash bosqichi hisoblanadi.

Bunda taraflar mehnat shartnomasi shartlari boʻyicha kelishuvga erishiladi hamda xodim va ish beruvchi tomonidan imzolanadi.

Mehnat shartnomasi shartlari boʻyicha kelishuvga erishish eng muhim bosqichlardan boʻlib, taraflar xohish irodasiga bogʻliq boʻladi. Bu MKning 103-105 va 126-moddalar hamda MKning boshqa talablari va qonunchilik talablariga muvofiq amalga oshiriladi.

Mehnat shartnoma xodim va ish beruvchi tomonidan imzolangandan keyin qonuniy kuchga ega boʻladi va xodim ishga qabul qilingan hisoblanadi.

Keyingi uchinchi bosqichda ish beruvchi tomonidan xodimni ishga qabul qilish toʻgʻrisida rasmiy buyruq chiqaradi. Bu buyruq mehnat shartnomasining huquqiy ijrosini taʼminlaydi.

Shuningdek, ishga qabul qilish haqidagi maʼlumotlarni xodimning mehnat daftarchasiga va “Yagona milliy mehnat tizimi” idoralararo dasturiy-apparat kompleksiga kiritilishi talab etiladi.

Ishga qabul qilish haqidagi maʼlumotlarni xodimning mehnat daftarchasiga kiritish faqat xodimga qogʻoz shakldagi mehnat daftarcha yuritilayotganda kiritiladi.

Oʻzbekiston Respublikasi Prezidentining 2019 yil 31 oktyabrdagi “Yagona milliy mehnat tizimi” idoralararo dasturiy-apparat kompleksini joriy qilish chora-tadbirlari toʻgʻrisida”gi PQ-4502-son qarorining 3-bandiga asosan 2020 yil 1 yanvardan boshlab yangi mehnat shartnomalarini tuzish, amaldagi mehnat shartnomalariga oʻzgartirish kiritish, shuningdek ularni tugatish holatlarini “YAMMT” IDAKda majburiy roʻyxatdan oʻtkazish tartibi joriy etilgan. Bunda 2020 yil 1 yanvarga qadar tuzilgan amaldagi mehnat shartnomalari 2020 yil 1 sentyabrdan kechiktirmasdan “YAMMT” IDAKda roʻyxatdan oʻtkazilishi shartligi belgilangan. 2020 yil 1 yanvardan boshlab, roʻyxatdan oʻtkaziladigan mehnat shartnomalaridagi maʼlumotlar asosida “YAMMT” IDAKda avtomatik tarzda shakllantiriladigan xodimning mehnat faoliyati toʻgʻrisidagi maʼlumotlarni oʻz ichiga oluvchi elektron mehnat daftari joriy etilgan.

Moddada nazarda tutilgan uchta bosqich ishga qabul qilish jarayonini huquqiy, axborot-texnologik va ijtimoiy jihatdan shakllantirilgan tizim sifatida namoyon etadi. Bu jarayon barcha ishtirokchilarning huquqiy kafolatlarini taʼminlashga qaratilgan. Xususan, tanishtirish bosqichi - axborot huquqining kafolati; shartnoma tuzilishi - shartnomaviy erkinlikning namoyoni; buyruq va elektron roʻyxat - mehnat munosabatlarining hisobotliligi va oshkoraligini taʼminlaydi.

Bundan tashqari, ishga qabul qilish jarayonlari yuzasidan elektron auditorlik mexanizmini joriy etish va uni YAMMT bilan integratsiya qilish Oʻzbekistonda mehnat munosabatlarini yanada samarali boshqarishga xizmat qiladi.