1. Sharhlanayotgan norma xodimning shaxsiga doir maʼlumotlarini himoya qilish huquqlarini mustahkamlaydi va xodimning shaxsga doir maʼlumot mustahkam tizim orqali himoya qilinadi.

Milliy qonunchilik xodim shaxsiy maʼlumotlarini faqat qonuniy maqsadlarda va xodimning roziligi bilan ishlatilishini nazorat qiladi.

Zero, Oʻzbekiston Respublikasi “Shaxsga doir maʼlumotlar toʻgʻrisida”gi Qonuni 27-moddasiga koʻra, davlat shaxsga doir maʼlumotlarning himoya qilinishini kafolatlaydi.

Mulkdor va (yoki) operator, shuningdek uchinchi shaxs shaxsga doir maʼlumotlarni himoya qilish boʻyicha quyidagilarni taʼminlaydigan huquqiy, tashkiliy va texnik choralarni koʻradi:

subʼyektning oʻz shaxsiy hayotiga aralashuvdan himoya qilinish huquqi amalga oshirilishini;

shaxsga doir maʼlumotlarning yaxlitligini va but saqlanishini;

shaxsga doir maʼlumotlarning maxfiyligiga rioya etilishini;

shaxsga doir maʼlumotlarga qonunga xilof ravishda ishlov berilishining oldi olinishini.

Ish beruvchi notoʻgʻri yoki toʻliq boʻlmagan maʼlumotdan foydalanishga haqli emas.

Xodim shaxsiy maʼlumotlarini tuzatish, qoʻshimcha maʼlumot qoʻshish va barcha tegishli shaxslarga bu tuzatish haqida xabar qilish huquqiga ega.

Agar ish beruvchi qonunga zid qarorlar qabul qilsa yoki maʼlumotlarni notoʻgʻri ishlatsa, xodim sudga murojaat qilish orqali oʻz huquqini tiklaydi.

Xodim kadrlar boʻlimida oʻz maʼlumotlarini tekshirib, nusxalarini oladi.

Agar maʼlumotlarda xato boʻlsa, xodim ularni tuzatish uchun ariza beradi va tuzatish ishlari barcha tegishli shaxslarga xabar qilinadi.

2. Ish beruvchi xodim haqida toʻplangan shaxsiy maʼlumotlarga qonunga muvofiq ravishda ishlov berishi kerak.

Zero, Oʻzbekiston Respublikasi “Shaxsga doir maʼlumotlar toʻgʻrisida”gi Qonuni 31-moddasiga koʻra, mulkdor va (yoki) operator shaxsga doir maʼlumotlarga ishlov berishni amalga oshirish huquqiga ega.

Mulkdor va (yoki) operator:

shaxsga doir maʼlumotlar toʻgʻrisidagi qonunchilikka rioya etishi;

subʼyektning murojaatiga koʻra uning shaxsga doir maʼlumotlariga ishlov berishga taalluqli axborotni taqdim etishi;

oʻzi vazifalarini bajarish uchun zarur va yetarli boʻlgan shaxsga doir maʼlumotlar tarkibini tasdiqlashi;

shaxsga doir maʼlumotlarga ishlov berishdan koʻzlangan maqsadga erishilgan taqdirda, shuningdek ushbu Qonunda belgilangan boshqa hollarda ularni yoʻq qilish choralarini koʻrishi;

qonunchilikda nazarda tutilgan hollarda subʼyektning oʻz shaxsga doir maʼlumotlariga ishlov berish uchun roziligi olinganligi dalilini taqdim etishi;

basharti yangi maʼlumotlarning ishonchliligi hujjatlar bilan tasdiqlansa, shaxsga doir maʼlumotlarni oʻzgartirishi va (yoki) toʻldirishi yoxud bunday oʻzgartirish va (yoki) toʻldirishni kiritish imkoni boʻlmagan taqdirda bu maʼlumotlarni yoʻq qilishi;

shaxsga doir maʼlumotlarga ishlov berish shartlari buzilganligi toʻgʻrisida axborot mavjud boʻlgan taqdirda, ularga ishlov berishni vaqtincha toʻxtatishi yoki ularni yoʻq qilishi;

subʼyektning shaxsga doir maʼlumotlariga ishlov berishni vaqtincha toʻxtatish va (yoki) ularni yoʻq qilish uchun subʼyekt tomonidan hujjatlarni elektron tarzda berish imkoniyatini taʼminlashi;

shaxsga doir maʼlumotlar oʻzgartirilgan, yoʻq qilingan va ulardan foydalanish cheklangan hollarda subʼyektni, shuningdek shaxsga doir maʼlumotlarga ishlov berishning boshqa ishtirokchilarini yozma shaklda xabardor qilishi;

shaxsga doir maʼlumotlar uchinchi shaxsga berilgan taqdirda, subʼyektni yozma shaklda xabardor qilishi;

oʻz mulki boʻlgan va (yoki) ishlov berilayotgan shaxsga doir maʼlumotlar bazalarini roʻyxatdan oʻtkazishi;

shaxsga doir maʼlumotlarni himoya qilish boʻyicha zarur huquqiy, tashkiliy va texnik choralarni koʻrishi shart.

Mulkdor va (yoki) operator shaxsga doir maʼlumotlarga ishlov berishni quyidagi hollarda uchinchi shaxsga topshirishga haqli:

subʼyektning yozma shakldagi, shu jumladan elektron hujjat tarzidagi roziligi mavjud boʻlgan taqdirda;

agar qaror mulkdor va subʼyekt oʻrtasidagi shartnomani ijro etish yoki ilgari tuzilgan shartnoma shartlarini bajarish uchun qabul qilinayotgan boʻlsa;

qonunchilikda nazarda tutilgan hollarda.

Mulkdorning va (yoki) operatorning, shuningdek uchinchi shaxsning shaxsga doir maʼlumotlarni himoya qilish boʻyicha majburiyatlari shaxsga doir maʼlumotlarni yigʻish paytidan eʼtiboran vujudga keladi va ular yoʻq qilib tashlangan yoki egasizlantirilgan paytga qadar amal qiladi.

Mulkdor va (yoki) operator shaxsga doir maʼlumotlarga ishlov berish va ularni himoya qilish bilan bogʻliq ishlar uchun masʼul boʻlgan tarkibiy boʻlinmani yoki mansabdor shaxsni belgilaydi hamda uning ishini Shaxsga doir maʼlumotlarga ishlov berishning namunaviy tartibiga muvofiq taʼminlaydi.

Agar maʼlumotda xatolik, ortiqcha yoki eski maʼlumot boʻlsa, xodim uni tuzatishni, toʻldirishni yoki umuman chiqarib tashlashni talab qilish huquqiga ega.

Agar ish beruvchi xodimning bu talabini qondirmasa, xodim bu qarorga yozma norozilik bildirishi mumkin.

Xodimning yozma noroziligi uning shaxsiy maʼlumotlariga nisbatan haq-huquqlari buzilganini rasman qayd etadi va bu keyinchalik isbot vositasi sifatida xizmat qiladi.